បច្ចុប្បន្ន ពលរដ្ឋនៅជុំវិញពិភពលោក បានចាប់អារម្មណ៍យ៉ាងខ្លាំង ដល់សកម្មភាពផលិតវ៉ាក់សាំង ក៏ដូចចែកចាយ ដើម្បីបង្កាកូវីដ១៩ នៅលើពិភពលោក។ បច្ចុប្បន្នមានក្រុមហ៊ុនជាច្រើន ផលិតវ៉ាក់សាំងទទួលបានជោគជ័យហើយកំពុងតែប្រើប្រាស់ ក្នុងនោះមាន រុស្ស៊ី ចិន អាមេរិក អាល្លឺម៉ង់ អង់គ្លេស…ជាដើម ។
នៅថ្ងៃទី១១ខែធ្នូឆ្នាំ២០២០ ប្រទេសកូរ៉េខាងត្បូង ចិន និងជប៉ុន បានឯកភាពសហការណ៍គ្នាទប់ស្កាត់កូវីដ១៩ និងចែកចាយវ៉ាក់សាំង ប្រកបដោយតម្លាភាព ។ ប្រទេសទាំងបីបានព្រមព្រៀងគ្នា ថាវ៉ាក់សាំងកូវីដ១៩ គឺជាផលិតផលរួមរបស់ពិភពលោក ហើយធានា ទទួលបានការចែកចាយស្មើភាពគ្នា ទាំងចំនួននិងតម្លៃ។
ពាក់ព័ន្ធនិងតម្លៃវ៉ាក់សាំង មកទល់ពេលនេះមិនទាន់ប្រាកដ ថាមានតម្លៃប៉ុន្មាននោះឡើយ ដោយវ៉ាក់សាំងប្រឆាំងកូវីដ១៩ គឺរដ្ឋាភិបាលប្រទេសនីមួយៗជាអ្នកទិញ ដើម្បីយកទៅចាក់ ជូនពលរដ្ឋដោយឥតគិតថ្លៃ។ តម្លៃវ៉ាក់សាំងអាស្រ័យទៅលើទំនាក់ទំនងសម្ព័ន្ធមិត្ត និងភូមិសាស្ត្រនយោបាយផងដែរ ហើយការបញ្ជាទិញមុន ទិញក្រោយ មានតម្លៃខុសគ្នា។ មួយវិញទៀតប្រទេសដែលចូលរួមក្នុងការធ្វើតេស្តដំណាក់កាលចុងក្រោយ ក៏ទទួលបានអាទិភាព ក្នុងការផ្គត់ផ្គង់ ទាំងតម្លៃផងដែរ។
មួយវិញទៀត តម្លៃវ៉ាក់សាំងក៏អាស្រ័យទៅលើភាគរយនៃប្រសិទ្ធភាពរបស់វាដែរ ហើយក្រុមហ៊ុន ផលិតឱសថ Oxford-AstraZeneca របស់អង់គ្លេសមានតម្លៃថោក ជាងគេ គឺត្រឹមតែ ៣ដុល្លារប៉ុណ្ណោះក្នុងមួយដូស។ ដូច្នេះទិញមួយលានដូសមានតម្លៃ៣លានដុល្លារ ។
ចំណែកវ៉ាក់សាំងរបស់ ក្រុមហ៊ុនអាមេរិក និងអាល្លឺម៉ង់ Pfizer-BioNTech ដែលកំពុងតែប្រើប្រាស់ នៅប្រទេសមួយចំនួនមានតម្លៃ ១៩,៥ដុល្លារ ក្នុងមួយដូស ហើយសម្រាប់មនុស្សម្នាក់ត្រូវចាក់វ៉ាក់សាំង Pfizer-BioNTech ចំនួន២ដង(ទិញមួយលានដូសតម្លៃ១៩,៥លានដុល្លា)។ នៅក្នុងប្រទេសឥណ្ឌា ក្រុមហ៊ុននេះប្រកាសលក់ក្នុងតម្លៃតែ១០ដុល្លារប៉ុណ្ណោះក្នុងមួយដូស(១លានដូសតម្លៃ១០លានដុល្លារ) ហើយក្រុមហ៊ុនកំពុងស្នើរឲ្យឥណ្ឌាអនុម័តប្រើប្រាស់បន្ទាន់។
ដោយឡែកវ៉ាក់សាំងរបស់ក្រុមហ៊ុន Moderna ដែលបច្ចុប្បន្ននេះ វាមានតម្លៃចន្លោះពី ២៥ដុល្លារ ដល់ ៣៧ដុល្លារក្នុងមួយដូស(១លានដូសមានតម្លៃប្រមាណ២៥-៣៧លានដុល្លារ)។ ដោយឡែកសម្រាប់វ៉ាក់សាំង Moderna នេះ ខាងក្រុមហ៊ុនបានអះអាងថាមានប្រសិទ្ធិភាពដល់ទៅ ៩៤,៥% ហើយសម្រាប់ការចាក់ចំនួន២ដង។
ចំណែកវ៉ាក់សាំងរបស់រុស្ស៊ី និងចិនវិញមានតម្លៃ ទាបជាងនេះ ។ ប៉ុន្តែតម្លៃអាចនឹងប្រែប្រួល គ្រប់ពេលវេលា ហើយកាន់តែធ្លាក់ថ្លៃ ក្រោយការចែកចាយបានច្រើន ហើយមិនមានអ្នកឆ្លងកូវីដ១៩ច្រើននៅពេលខាងមុខ៕
រូបភាព៖ AFP/TTXVN
