ខេត្តស្ទឹងត្រែង៖ នារសៀល ថ្ងៃ ព្រហស្បតិ៍ ទី ១៧ ខែធ្នូ ឆ្នាំ២០២០ លោកម៉ុម សារឿន អភិបាលនៃគណៈអភិបាលខេត្តបានដឹកនាំមន្រ្តីបច្ចេកទេសចុះពិនិត្យវឌ្ឍនភាពការងារជួសជុលផ្លូវ បេតុងប្រវែងសរុប ៨៥៦,៧ម៉ែត្រ ទទឹង(១០ម៉ែត្រ ១២ ម៉ែត្រ និង១៣ម៉ែត្រ)  ចំណុចពី (ស្ពានព្រែកពោធ៍ ទៅស្ពានសេកុង)  និង ការស្ថាបនាផ្លូវកៅស៊ូ DBST ប្រវែង ៨៣០ម៉ែត្រ ទទឹង ៨ម៉ែត្រ នៅចំណុច ពី (ស្ពានអូរដំណាក់ ទៅស្ពានបាចុង) ស្ថិតតាមបណ្តោយមាត់ទន្លេ ក្នុងក្រុងស្ទឹងត្រែង  ។

មានប្រសាសន៍ ក្នុងឱកាសចុះត្រួតពិនិត្យលោកម៉ុម សារឿន អភិបាលខេត្តបានឲ្យដឹងថា ដើមឡើយផ្លូវ តាមមាត់ទន្លេ ទាំងនេះបានរងការខូចខាត ដោយសារ ទឹកជំនន់ បណ្តាលឲ្យបាក់ស្រុត ដូចនេះ ឯកឧត្តម ក៏បាន ជំរុញឲ្យមានការជួសជុល និង ស្ថាបនា ឡើងវិញ ដោយលើកផ្លូវឲ្យ ខ្ពស់ជាងមុន ដើម្បីបង្ការ កុំឲ្យមានការខូចខាតផ្លូវពេលដែលមាន ទឹកជំនន់ កើតមានឡើង ។ ពិសេសទៀតនោះជួយសម្រួលដល់ការធ្វើដំណើររបស់ប្រជាពលរដ្ឋ បានងាយស្រួល ព្រមទាំង ជួយលើកកម្ពស់ដល់ សោភ័ណ្ឌភាពក្នុងក្រុង ស្ទឹងត្រែងទាំងមូល។

លោកអភិបាលខេត្តបានបន្តថា: ការជួសជុលដាក់ជាផ្លូវបេតុងនេះអាចនឹងមានធ្វើឲ្យផ្លូវទាំង ២ ខ្សែនេះមានភាពរឹងមាំនិងយូរអង្វែងដោយមិនបង្កផលលំបាកដល់ប្រជាពលរដ្ឋក្នុងតំបន់មានការលំបាកធ្វើដំណើរទៀតឡើយ ជាពិសេសប្រជាពលរដ្ឋដែលធ្វើដំណើរឆ្លងកាត់កាន់តែមានភាពងាយស្រួលច្រើនឡើងៗ ដោយមិនចាំបាច់ព្រួយបារម្ភពីផលលំបាកដូចពីមុនៗទៀតឡើយ។

ឆ្លៀតឱកាសនេះពិនិត្យវឌ្ឍភាពជួសជុលនិងស្ថាបនាផ្លូវឡើងវិញ ក្នុងសង្កាត់ស្ទឹងត្រែងនេះ លោកម៉ុម សារឿន អភិបាលខេត្តបានណែនាំមន្ត្រីជំនាញ និងក្រុមការងារត្រូវយកចិត្តទុកដាក់ក្នុងការបន្តសាងសង់ផ្លូវបេតុង និង ផ្លូវ កៅស៊ូ DBST នេះឲ្យមានគុណភាពខ្ពស់ដើម្បីធានានូវភាពរឹងមាំ និងប្រើប្រាស់បានយូរអង្វែង៕

ដោយ៖មាស សុផាត