សារព័ត៌មានអេស្ប៉ាញ Marca បានចេញផ្សាយថា ការចាប់ឆ្នោតប្រកួតពានរង្វាន់ Supercopa de Espana ឆ្នាំ២០២០ ត្រូវបានធ្វើឡើងស្របពេលដែលក្រុម Real Sociedad នឹងត្រូវជួបជាមួយក្រុម Barcelona ខណៈដែល Real Madrid ដើម្បីតតាំងជាមួយក្រុម Athletic Bilbao ក្នុងការប្រកួតវគ្គពាក់កណ្តាលផ្តាច់ព្រ័ត្រ។

ការប្រកួតទាំងនេះនឹងត្រូវប្រកួតនៅថ្ងៃទី១៣ និងថ្ងៃ១៤ ខែមករាឆ្នាំ២០២១ ហើយអ្នកឈ្នះនឹងត្រូវប្រកួតផ្តាច់ព្រ័ត្រនៅថ្ងៃទី១៧ ខែមករាឆ្នាំ២០២១។

មានពហុកីឡដ្ឋានចំនួន៣ដែលត្រូវបានប្រើសម្រាប់ការប្រកួតទាំងនេះគឺកីឡដ្ឋាន Estadio Nuevo Arcangel នៅ Cordoba (Real Sociedadប៉ះ Barcelona), La Rosaleda នៅ Malaga (Real Madrid ប៉ះAthletic) និង Estadio de la Cartuja នៅ Seville សម្រាប់វគ្គផ្តាច់ព្រ័ត្រ។

ការប្រកួតដណ្តើមពានរង្វាន់ Supercopa de Espana ផ្នែកស្ត្រីក៏មានការប្រកួតវគ្គពាក់កណ្តាលផ្តាច់ព្រ័ត្រដែរដោយ Levante នឹងត្រូវប្រកួតជាមួយ Logrono ហើយ Atletico Madrid នឹងឡើងមកប៉ះ Barcelona ៕ដោយ៖ភារៈ