ក្រោយរយៈពេលជាច្រើនខែថែគ្រប់គ្រងបាននូវការឆ្លងរាលដាលកូវីដ-១៩ ប៉ុន្តែនៅពេលនេះបែរជាឆ្លងរាលដាលទ្រង់ទ្រាយធំនៅក្នុងសហគមន៍ គឺស្ថិតនៅក្នុងផ្សារគ្រឿងសមុទ្រដ៏ធំនៅក្នុងប្រទេសនេះ។
ការផ្ទុះកូវីដ-១៩ ក្នុងសហគមន៍លើកនេះគឺស្ថិតនៅក្នុងផ្សារ Mahachai ដោយឆ្លងចេញពីស្ត្រីម្នាក់អាយុ៦៧ឆ្នាំជនជាតិថៃត្រូវបានរកឃើញវិជ្ជមានកូវីដ-១៩ នៅថ្ងៃទី១៧ខែធ្នូ។ ផ្សារMahachai គឺជាទីតាំងបោះដុំគ្រឿងសមុទ្រដ៏ធំបំផុតក្នុងប្រទេសថៃ ស្ថិតនៅក្នុងខេត្ត Samut Sakhon ជិតទីក្រុងបាងកក។
ក្រោយរយៈពេល៤ថ្ងៃដែលរកឃើញស្ត្រីអាយុ៦៧ឆ្នាំ ក៏បានបន្តរកឃើញ៤នាក់ផ្សេងទៀត ភាគច្រើនជាមនុស្សមកពីប្រទេសមីយ៉ាន់ម៉ា។ កាលពីថ្ងៃទី២១ ខែធ្នូមានពលករ៣៦០នាក់ ចូលក្នុងប្រទេសថៃត្រូវបានរកឃើញឆ្លងកូវីដ-១៩ ធ្វើឲ្យចំនួនអ្នកឆ្លងនៅថៃកើនឡើងខ្ពស់។ ស្ត្រីដែលជាដើមហេតុនៃការឆ្លងមិនមានប្រវត្តិចេញពីប្រទេសថៃនោះឡើយ ដូច្នេះ មន្ត្រីសុខាភិបាលកំពុងតែខិតខំស្វែងរកប្រភពនៃការចម្លង។
ក្រៅពីប្រទេសចិន ថៃគឺជាប្រទេសទីពីរឆ្លងកូវីដ-១៩ មុនគេ ប៉ុន្តែចំនួនអ្នកឆ្លងក្នុងប្រទេសនេះទាប គឺមានជាង៤០០០នាក់ប៉ុណ្ណោះ និងស្លាប់៦០នាក់៕
រូបភាព៖ BBC
