សភ្នំពេញ ៖ សូមជម្រាបថា នៅក្នុងថ្ងៃនេះផងដែរ សម្តេចតេជោ ហ៊ុន សែន នាយករដ្ឋមន្ត្រីកម្ពុជា មានប្រសាសន៍ព្រមានទៅបុគ្គលម្នាក់ឈ្មោះ ចាន់ យ៉េត ស្ថិតនៅក្នុងគណបក្សមួយ និងជាអតីតសមាជិកឧត្តមក្រុមប្រឹក្សាពិគ្រោះ និងផ្តល់យោបល់ ឲ្យបញ្ឈប់សកម្មភាពបំផុសបំផុល និងបោកប្រាស់ប្រជាជន នៅតំបន់អភិវឌ្ឍន៍ជម្រុក ស្ថិតនៅក្នុងខេត្តបន្ទាយមានជ័យ ជាបន្ទាន់ បើមិនចង់ជាប់គុកទេ ។
សម្តេចតេជោ ហ៊ុន សែន បានប្រកាសព្រមានថា «បើអ្នកឯង មិនបញ្ឈប់សកម្មភាព និងដកខ្លួនចេញទេ អ្នកឯងនឹងត្រូវចាប់ខ្លួនភ្លាម! ខ្ញុំឲ្យខាងអង្គាពប្រឆាំងអំពើពុករលួយ រៀបចំឯកសាររួចហើយ បើអ្នកឯង មិនដកខ្លួនទេ នឹងត្រូវចាប់ខ្លួនភ្លាម។ អ្នកពាក់ព័ន្ធជាមួយ ចាន់ យ៉េត ក៏ត្រូវដកខ្លួនភ្លាម» ផងដែរ ។
សម្តេចតេជោ ហ៊ុន សែន ថ្លែងបែបនេះនៅព្រឹកថ្ងៃទី២៩ ខែធ្នូ ឆ្នាំ២០២០ ពាក់ព័ន្ធព្រឹត្តិការណ៍ «សហគមន៍២៨វិច្ឆិកា» និងសមិទ្ធផលកើតពីនយោបាយឈ្នះ=ឈ្នះ ព្រមទាំងការទទួលបានដំណក់ប្រេងលើកដំបូងរបស់កម្ពុជា មួយចេញពីគេហដ្ឋាន នាក្រុងតាខ្មៅ ដោយផ្សាយផ្ទាល់តាមទូរទ្សន៍ជាតិកម្ពុជា និងផ្សាយបន្តផ្ទាល់ដោយប្រព័ន្ធផ្សព្វផ្សាយ នៅក្នុងប្រទេសកម្ពុជាផងដែរ ។ សម្ដេចតេជោហ៊ុន សែន គឺជានាយករដ្ឋមន្ត្រីមួយរូប ដែលបានទប់ទល់ស្ថានភាព គ្រប់បែបយ៉ាងនៅក្នុងប្រទេសកម្ពុជា ទាំងស្ថានភាពនយោបាយ ការអភិវឌ្ឍប្រទេសជាតិ ពិសេសទប់ស្កាត់ជំងឺកូវីដ-19 ជាប់ចំណាត់ថ្នាក់លេខ 1 លើពិភពលោក។
សម្ដេចបានមានប្រសាសន៍លើកឡើងថា ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃកម្ពុជា នៅថ្ងៃទី០៩ ខែធ្នូ ឆ្នាំ២០២០ បានចេញព្រះរាជក្រឹត្យមួយ បញ្ចប់មុខតំណែង លោក ចាន់ យ៉េត ប្រធានគណបក្សនគរប្រជាធិបតេយ្យ ពីសមាជិកឧត្តមក្រុមប្រឹក្សាពិគ្រោះ និងផ្តល់យោបល់ ដែលមានឋានៈស្មើ ទេសរដ្ឋមន្ត្រី ។
តាមព្រះរាជក្រឹត្យដែលបណ្តាញព័ត៌មាន ទទួលបានបញ្ជាក់ថា ព្រះរាជក្រឹត្យបញ្ចប់តំណែង លោក ចាន់ យ៉េត បានធ្វើឡើងបន្ទាប់ពីមានសេចក្តីក្រាបបង្គំទូលថ្វាយរបស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ។
លោក ចាន់ យ៉េត នាពេលកន្លងទៅ បានពាក់ព័ន្ធយ៉ាងជ្រៅ ទៅនឹងទំនាស់ដីធ្លី នៅតំបន់បឹងជង្រុក និង៦៧១ ក្នុងស្រុកម៉ាឡៃ ខេត្តបន្ទាយមានជ័យ ។
យ៉ាងណាក៏ដោយ បើតាមមន្ត្រីជាន់ខ្ពស់រាជរដ្ឋាភិបាល បានបញ្ជាក់ប្រាប់អ្នកសារព័ត៌មាននាពេលថ្មីៗនេះឲ្យដឹងថា ក្រោយពេលប្រកាសនេះ លោក ចាន់ យ៉េត មិនបានឈប់ពាក់ព័ន្ធនឹងករណីដីធ្លីខាងលើនោះទេ ដោយលោកនៅតែឈរនៅពីក្រោយករណីនេះដដែល។
ដោយសារតែបញ្ហា លោក ចាន់ យ៉េត លូកដៃចូលយ៉ាងជ្រៅក្នុងរឿងដីធ្លីនៅខេត្តបន្ទាយមានជ័យ ទើបមានវត្តមាននាយករងខុទ្ទកាល័យសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចុះទៅធ្វើកិច្ចការនេះដោយផ្ទាល់ និងប្រកបដោយភាពទទួលខុសត្រូវបំផុត៕
ដោយ៖ សិលា
