ចំនួនអ្នកស្លាប់ដោយកូវីដ-១៩បានកើនឡើងខ្ពស់នៅលើពិភពលោក ដោយមានអ្នកស្លាប់កើនឡើងដល់ទៅជាង២លាននាក់ហើយ។ ជាមួយគ្នានេះបណ្តាប្រទេសជុំវិញពិភពលោក បានបង្កើនការចាក់វ៉ាក់សាំងដើម្បីទប់ស្កាត់ការឆ្លងប្រកបដោយប្រសិទ្ធភាព ។
តាមសារព័ត៌មានរ៉យទ័របានផ្សាយថា ពេលឆ្លងកូវីដ-១៩នេះមានអ្នកស្លាប់កើនឡើង១លាននាក់ក្នុងរយៈពេល៩ខែ ។ ប៉ុន្តែ ក្នុងរយៈពេល៣ខែបន្ទាប់មក ចំនួនអ្នកស្លាប់មានដល់ទៅ១លាននាក់ គឺខ្ពស់បំផុត ។
ចាប់តាំងពីដើមឆ្នាំ២០២១មកទល់ពេលនេះ ចំនួនអ្នកស្លាប់គិតជាមធ្យមក្នុងមួយថ្ងៃលើពិភពលោក មានដល់ទៅ11.900នាក់ មានន័យថាក្នុង៨វិនាទីមានអ្នកស្លាប់ម្នាក់ដោយកូវីដ-១៩ ។ អគ្គលេខាធិការអង្គការសហប្រជាជាតិ លោក Antonio Guterres បានប្រកាសថា ពិភពលោកប្រឈមនឹងការឈឺចាប់ ការបាត់បង់មនុស្សជាច្រើនដោយសារជំងឺឆ្លង ។
លោកAntonio Guterres បានបញ្ជាក់ថា នៅពីក្រោយនៃការស្លាប់ គឺជាតំណក់ទឹកភ្នែកនៃការបាត់បង់សាច់ញាតិជាទីស្រឡាញ់។ លោកបានអំពាវនាវដល់ពិភពលោកទាំងមូលសហការគ្នាទប់ស្កាត់ការឆ្លងរាលដាលឲ្យបានល្អបំផុត ។
តាមការវាយតម្លៃរបស់ (IHME) គិតមកដល់ថ្ងៃទី១ខែមេសាចំនួនអ្នកស្លាប់នៅលើពិភពលោកនឹងកើនឡើងដល់ទៅ២,៩លាននាក់ ។ ដោយសារតែល្បឿននៃការឆ្លងកើនឡើងខ្ពស់ ចំនួនអ្នកឆ្លងនឹងបន្តកើនឡើងក្នុងពេលខាងមុខ៕
រូបថត៖ Reuters
