កន្លងមកមានព័ត៌មានផ្សាយថាប្រទេសន័រវេសមានអ្នកស្លាប់ដល់ទៅ២៣នាក់ក្រោយការចាក់វ៉ាក់សាំងប្រឆាំងកូវីដ-១៩ ។ នៅពេលនេះ ក្នុងប្រទេសបារាំង ក៏មានព័ត៌មានផ្សាយថា មានមនុស្សចាស់៥នាក់បានស្លាប់ ប៉ុន្តែមិនទាន់ដឹងថាជាប់ពាក់ព័ន្ធនឹងវ៉ាក់សាំងដែរឬទេ។
តាមប្រភពព័ត៌មានបានឱ្យដឹងថា អ្នកស្លាប់នៅក្នុងប្រទេសបារាំង គឺមានអាយុចាប់ពី៧៥ឆ្នាំឡើង រស់នៅក្នុងផ្ទះមិនមែននៅក្នុងមណ្ឌលចាស់ជរានោះឡើយ ហើយមានជំងឺប្រចាំកាយជាច្រើន។
ក្រុមអ្នកជំនាញរបស់បារាំងបានបើកការស្រាវជ្រាវថាតើមនុស្សចាស់ ៥នាក់ដែលបានស្លាប់នោះគាត់ស្លាប់ដោយសារការចាក់វ៉ាក់សាំងកូវីដ-១៩ ដែរឬទេ ។ ក្រៅពីមនុស្ស៥នាក់ស្លាប់ ក៏មានករណីប្រតិកម្មតិចតួចចំនួន១៣៩នាក់ដែរក្រោយការចាក់វ៉ាក់សាំង។
មាន៣ករណីស្លាប់ ត្រូវបានផ្តល់ព័ត៌មានជូនកម្លាំងប៉ូលិស គឺម្នាក់នៅ Nancy ម្នាក់នៅទីក្រុងTours និងម្នាក់ទៀតនៅ Montpellier ។
កន្លងមកថ្មីៗនៅក្នុងប្រទេសន័រវេស មន្ត្រីសុខាភិបាលបានប្រកាសពីចំនួនអ្នកស្លាប់ក្រោយចាក់វ៉ាក់សាំង បាន១០ថ្ងៃកើនឡើងដល់ទៅ ២៣នាក់ ។ វ៉ាក់សាំងដែលប្រទេស ន័រវេស ចាក់ជូនពលរដ្ឋ គឺផលិតដោយក្រុមហ៊ុនPfizer របស់អាមេរិក និង BioNTech របស់អាល្លឺម៉ង់។
គិតមកដល់ថ្ងៃទី១៥ខែមករា ចំនួនអ្នកស្លាប់ក្រោយការចាក់វ៉ាក់សាំង បានកើនឡើងដល់ទៅ២៣នាក់ហើយក្នុងប្រទេសន័រវេស ។ ក្នុងចំណោមអ្នកស្លាប់ គឺមាន១៣នាក់ ត្រូវបានវះត្រួតពិនិត្យ មូលហេតុពិតប្រាកដនៃការស្លាប់ទាំងនោះ។ លទ្ធផលនៃការត្រួតពិនិត្យឃើញថា ប្រតិកម្មតិចតួចនៃវ៉ាក់សាំងកូវីដ-១៩ បូកផ្សំជាមួយ ជំងឺប្រចាំកាយ ទើបធ្វើឲ្យមានប្រតិកម្មកាន់តែខ្លាំងរហូតដល់ស្លាប់។
ដូច្នេះហើយ មជ្ឈមណ្ឌលចាស់ជរាន័រវេស បានស្នើឲ្យត្រួតពិនិត្យឲ្យបានល្អិតល្អន់មុនពេលចាក់វ៉ាក់សាំងកូវីដ-១៩ ដល់មនុស្សចាស់ ៕
រូបភាព៖ AP
