ខេត្តក្រចេះ៖ ស្រ្តីម្នាក់បានស្លាប់ភ្លាមៗនៅនឹងកន្លែងកើតហេតុដោយសារលូកដៃបិទកុងតាក់ម៉ាសុីនហើយត្រូវពីញ៉ុងម៉ាសុីនទាក់ក្រមាដែលបង់ជាប់កចូលកិនដាច់ដៃនិងខ្លួនយ៉ាងរន្ធត់បំផុត។
ហេតុការណ៍ពីញ៉ុងម៉ាសុីនកិនមនុស្សស្លាប់នេះបានកើតឡើងកាលពីវេលាម៉ោង១៤៖០០នាទីរសៀលថ្ងៃទី២១ ខែមករាឆ្នាំ២០២១ស្ថិតនៅត្រង់ចំណុចរោងចក្រកិនកៅស៊ូក្នុងក្រុមហ៊ុនដុងណាយអភិវឌ្ឍន៍កៅស៊ូក្នុងភូមិអូរព្រះ ឃុំអូរគ្រៀងស្រុកសំបូរ ខេត្តក្រចេះ។
ប្រភពបានឱ្យដឹងថា ជនរងគ្រោះឈ្មោះ ម៉ាក់ សុផស ភេទស្រី អាយុ៥០ឆ្នាំជនជាតិខ្មែរ ជាកម្មកររោងចក្រក្រុមហ៊ុនខាងលើនេះ។
ប្រភពបន្តថា មូលហេតុនៃគ្រោះថ្នាក់នេះគឺមកពីជនរងគ្រោះលូកដៃបិទកុងតាក់ម៉ាស៊ីនហើយក៏បានទាក់ក្រមាដែលស្ត្រីរងគ្រោះរុំជាប់នឹងកទាញធ្លាក់ចូលក្នុងពីញ៉ុងម៉ាសុីនបណ្តាលឱ្យម៉ូទរ័ទាញដៃខាងស្តាំចូលទៅក្នុងពីញ៉ុងម៉ាសុីនរួចទាញទាំងមនុស្សចូលទៅទៀតគាបដាច់ខ្សល់ស្លាប់ភ្លាមមួយរំពេចតែម្តង។
ក្រោយកើតហេតុសមត្ថកិច្ចបានចុះពិនិត្យហើយបានប្រគល់សពឱ្យសាច់ញាតិក្រុមគ្រួសារយកទៅធ្វើបុណ្យតាមប្រពៃណី៕
ដោយ៖ ជីវ័ន្ត
