ខេត្តបន្ទាយមានជ័យ, រដ្ឋបាលខេត្តបន្ទាយមានជ័យ សូមជម្រាបជូនដំណឹងដល់សាធារណៈជនឲ្យបានជ្រាបថា, នៅថ្ងៃទី២២ ខែមករា ឆ្នាំ២០២១ វេលាម៉ោង១៦ នាទី ៣០នាទី ល្ងាច មានករណីបុរសម្នាក់ជាពលករខ្មែរ ភេទប្រុស អាយុ៥៣ឆ្នាំ មាន មរណៈភាព ទីលំនៅភូមិអូរសំព័រ ឃុំអូរសំព័រ ស្រុកម៉ាឡៃ ខេត្តបន្ទាយមានជ័យ។  បានទទួលដំណឹងនេះរដ្ឋបាលខេត្តបន្ទាយមានជ័យ សូមជម្រាបជូនដំណឺង ដល់សាធារណៈជន ឲ្យបានជ្រាបថាបុរសជាពលករខ្មែរខាងលើ បានចូលមកប្រទេសកម្ពុជា តាមច្រកចំបក់ ស្ថិតនៅភូមិចំបក់ ឃុំបឹងបេង ស្រុកម៉ាឡៃ ខេត្តបន្ទាយមានជ័យ បានបញ្ជូនបន្តមកធ្វើចត្តាឡីស័កនៅក្នុងមណ្ឌលចត្តាឡីស័កសម្តេចឪ នៅ ម៉ោង ១១: ៥៥ នាទី ថ្ងៃត្រង់ នៅថ្ងៃទី១៧ ខែមករា ឆ្នាំ២០២១ និងបានយកសំណាកនៅថ្ងៃទី១៧ ខែមករា ឆ្នាំ២០២១ ហើយទទួលបានលទ្ធផលអវិជ្ជមាននៅថ្ងៃទី១៨ ខែមករា ឆ្នាំ២០២១។ នៅថ្ងៃទី១៩ ខែមករា ឆ្នាំ២០២១ វេលាម៉ោង ១៣:៥០ នាទី អ្នកគ្រប់គ្រងនៅមណ្ឌលចត្តាឡីស័កនៅវិទ្យាល័យម្តេចឪ បានពិនិត្យ ឃើញថាបុរសខាងលើមានសភាពមិនល្អ ក៏បានបញ្ជូនទៅមន្ទីរពេទ្យខេត្ត ដោយសារចុកចុងដង្ហើម និងលើស សម្ពាធឈាម។ នៅម៉ោង ១៤:១០នាទី រសៀល អ្នកជំងឺបានមកដល់មន្ទីរពេទ្យខេត្តមិត្តភាពកម្ពុជា-ជប៉ុន មង្គលបូរី ក្នុងស្ថានភាព ចុកចុងដង្ហើម និងសម្ពាធឈាម (១៦០/១០០ mmHg) ហើយមានប្រវត្តិជក់បារី ពិសារស្រា ប្រវត្តិលើសសម្ពាធឈាម និងជាអ្នកជំងឺលើសទម្ងន់។ ក្រុមគ្រូពេទ្យនៃមន្ទីរពេទ្យខេត្តបានយកចិត្ត ទុកដាក់ព្យាបាល និងថែទាំដោយឱសថបញ្ចុះសម្ពាធឈាម និងឱសថព្យាបាលក្រពះ និងស្រាវជ្រាវរកជំងឺ ផ្សេងៗទៀតដោយបានសន្និដ្ឋានរោគវិនិច្ឆ័យជាបឋមគឺជាជំងឺដំបៅក្រពះហើយក្រុមគ្រូពេទ្យបានពិនិត្យព្យាបាល ជាបន្តបន្ទាប់លុះដល់ថ្ងៃទី២២ ខែមករា ឆ្នាំ២០២១ វេលាម៉ោង១៤:៣០ នាទី រសៀល ក្រុមគ្រូពេទ្យបានទៅ ពិនិត្យអ្នកជំងឺឃើញថាមានអាការៈចុកពោះ និងចុកដើមទ្រូងខ្លាំង ហើយគ្រូពេទ្យបានផ្តល់ឱសថ និងបាន រៀបចំវាស់អគ្គីសនីបេះដូង (ECG) ប៉ុន្តែអ្នកជំងឺមានអាការៈកាន់តែធ្ងន់ធ្ងរ និងធ្វើទុក្ខខ្លាំង ក្រុមគ្រូពេទ្យប្រឹងប្រែង យកចិត្តទុកដាក់សង្គ្រោះយ៉ាងខ្លាំងក្លា តែជាអកុសលអ្នកជំងឺបានស្លាប់នៅវេលាម៉ោង ១៦:៣០ នាទីល្ងាច។

រដ្ឋបាលខេត្ត សូមបញ្ជាក់ជូនផងដែរថា ករណីបុរសជាប្រជាពលករដែលទទួលមរណភាពខាងលើ មិនមែនស្លាប់ដោយសារជំងឺកូវីដ-១៩ទេ គឺស្លាប់ដោយសារជំងឺគាំងបេះដូង (Infarctus du myocarde) ។ រដ្ឋបាលខេត្ត សូមសម្តែងនូវការសោកស្តាយ និងចូលរួមរំលែកទុក្ខដ៏ក្រៀមក្រំជាមួយក្រុមគ្រួសារនៃសព។ 

អាស្រ័យដូចបានជម្រាបជូនខាងលើ សូមសាធារណៈជន មេត្តាជ្រាបជាព័ត៌មាន៕

ដោយ, សុខ ខេមរា