ភ្នំពេញ៖ នារី២នាក់បានបាត់ម៉ូតូ ហុងដាស្កូពី០២១មួយគ្រឿងក្រោយពីនាំគ្នាជិះចូលទៅហូបស៊ុបនៅហាងយីហោ រិទ្ធី ត្រពាំងថ្លឹង៩៩៩៩(១) រួចបានចេញមកវិញស្រាប់បាត់ម៉ូតូមិនថាចោរលួចយកទៅនៅពេលណា បង្កឲ្យមានការភ្ញាក់ផ្អើលនៅវេលាម៉ោងប្រមាណជាង១០ យប់ថ្ងៃទី ១៦ ខែកុម្ភៈឆ្នាំ ២០២១នៅចំណុចហាងស៊ុបយីហោ រិទ្ធី ត្រពាំងថ្លឹង៩៩៩៩(១)នៅខាងកើតស្តុបទួលបង្រប្រមាណជាង ១០០ ម៉ែត្រ តាមបណ្ដោយមហាវិថីចោមចៅ ក្នុងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
តាមប្រភពពីជនរងគ្រោះដោយមិនបញ្ចេញឈ្មោះ បានឲ្យដឹងថា ម៉ូតូរបស់គាត់គឺម៉ាកហុងដាស្កុបពី០២១ ពណ៌ស ដោយមិនបញ្ជាក់ពីស្លាកលេខ ហើយមុនកើតហេតុ រូបគាត់មានគ្នាពីរនាក់ បានជិះម៉ូតូចូលទៅហូបស៊ុបនៅហាងកើតហេតុខាងលើ ដោយម្ចាស់ហាងបានយកសំបុត្រមកកឹបត្រឹមត្រូវ លុះដល់ម៉ោងកើតហេតុខាងលើក៏បាននាំគ្នាចេញមកវិញស្រាប់តែបាត់ម៉ូតូមិនដឹងថាជនសង្ស័យធ្វើសកម្មភាពលួចយកទៅពេលណា រួចក៏មានការភ្ញាក់ផ្អើលដល់សមត្ថកិច្ចមូលដ្ឋានចុះមកធ្វើការសួរនាំនៅនឹងកន្លែងកើតហេតុ។
ក្រោយកើតហេតុសមត្ថកិច្ចបាននាំជនរងគ្រោះនិងម្ចាស់ហាងទៅប៉ុស្តិ៍នគរបាលរដ្ឋបាលចោមចៅទី១ ដើម្បីធ្វើការសម្រុះសម្រួលគ្នារយ:ជាង១ម៉ោង បន្ទាប់មកខាងភាគីម្ចាស់ហាងសូមពន្យាពេល៤ ទៅ៥ ថ្ងៃ ដើម្បីធ្វើការដោះស្រាយគ្នាបន្តទៀត៕
ដោយ៖សុខាសែនជ័យ
