តាមសេចក្តីរាយការណ៍បានឲ្យដឹងថា ក្លិប Real Madrid គ្រោងនឹងត្រៀមទឹកប្រាក់ចំនួន៩០លានផោនសម្រាប់តារាឆ្នើមរបស់ក្លិប BorussiaDortmund គឺខ្សែប្រយុទ្ធ Erling Haaland នៅរដូវកាលក្រោយ។

Haaland មានវ័យ២០ឆ្នាំកំពុងត្រូវបានក្លិបធំៗនៅអឺរ៉ុបយកជាគោលដៅបន្ទាប់ពីមានទម្រង់លេងយ៉ាងល្អនៅ Bundesliga ។ Real Madrid បានត្រៀមខ្លួនរួចជាស្រេចក្នុងការផ្លាស់ប្តូរសម្រាប់ Haaland មុនឆ្នាំ២០២១-២០២២ ។

តាមរបាយការណ៍បានឲ្យថា ក្លិបយក្ស La Liga នឹងព្យាយាមយក Luka Jovic ដែលកំពុងខ្ចីជើងនៅឯក្រុម Eintracht Frankfurt ឬ Mariano Diaz ដើម្បីជាផ្នែកមួយនៃកិច្ចព្រមព្រៀងនេះ។

សូមបញ្ជាក់ថា ខ្សែប្រយុទ្ធ Haaland បានស៊ុតបាល់បញ្ចូលទីចំនួន២៣គ្រាប់នៅក្នុងការប្រកួតជាច្រើនសម្រាប់ក្រុម Dortmund នៅរដូវកាលនេះ។ ក្រៅពីក្លិបយក្សនៅអេស្ប៉ាញមួយនេះ ក៏មានក្លិបធំៗជាច្រើននៅអង់គ្លេសចាប់អារម្មណ៍ផងដែរដូចជាក្លិប Chelsea, Manchester United ជាដើម ៕

ដោយ៖ភារៈ