ប្រទេសថៃ៖ តម្រូតថៃ បានចាប់ខ្លួនកម្មករទូកនេសាទខ្មែរ៥នាក់ ដែលធ្វើការនៅលើទូកនេសាទ ក្នុងខេត្តត្រាតប្រទេសថៃ ហើយជាប់សង្ស័យធ្វើសកម្មភាពចាប់រំលោភជនបរទេស២នាក់ ។
ក្រុមកម្មករខ្មែរចំនួន៥នាក់ ដែលធ្វើការនៅលើទូកនេសាទ ក្នុងខេត្តត្រាត ប្រទេសថៃ ត្រូវបានកំលាំងតម្រួតថៃ រួមជាមួយនឹងប្រជាពលរដ្ឋថៃប្រមាណជាង៥០នាក់ បានដេញតាមប្រមាញ់រហូតចាប់ខ្លួនបានទាំងអស់ បន្ទាប់ពីក្រុមពលករខ្មែរទាំងនេះ បាននាំគ្នាឡើងគោកផឹកស៊ី រួចហើយ ក៏បែកគំនិតចាប់រំលោភនារីជាភ្ញៀវទេសចរណ៍បរទេស២នាក់ ដែលកំពុងដើរកំសាន្តតាមឆ្នេរសមុទ្រ ។
តាមការរៀបរាប់ពីបុគ្គលិករបស់សណ្ឋាគារ សែនអ៊ិនស៊ី រីសត ស្ថិតក្នុងស្រុកកោះកូតខេត្តត្រាត ប្រទេសថៃ បានបញ្ជាក់ថា នៅល្ងាចថ្ងៃទី២៨ ខែកុម្ភៈ ឆ្នាំ២០១៦ មានការភ្ញាក់ផ្អើលមួយបានកើតឡើងនៅប៉ែកខាងក្រោយនៃសណ្ឋាគារ ដោយសារតែមានភ្ញៀវដែលជាជនជាតិបរទេសម្នាក់ បានរត់មកស្រែកអោយគេជួយទាំងការភ័យខ្លាច ដែលគេបានបញ្ជាក់ថា ពួកគេមានគ្នា៤នាក់ ប្រុសពីរនាក់ និងស្រីពីរនាក់បាននាំគ្នាមកដើរលែងកំសាន្តតាមឆ្នេរសមុទ្រ ហើយក៏ត្រូវក្រុមក្មេងស្ទាវចំនួន៥នាក់ បានស្ទុះមកវាយពួកខ្លួន ព្រមទាំងបានចាប់រំលោភនារីពីរនាក់នោះយ៉ាងព្រៃផ្សៃ ។
ប្រភពដដែលបានបន្តថា នៅពេលនោះដែរ ក៏មានប្រជាពលរដ្ឋប្រមាណជាង៥០នាក់និងកំលាំងតម្រួតបានចេញប្រតិបត្តិការទៅកាន់ចំណុចកើតហេតុដើម្បីតាមរកមុខសញ្ញាដែលប្រព្រឹត្តបទល្មើសនេះយកមកផ្តន្ទាទោសតាមផ្លូវច្បាប់ ។
ជនសង្ស័យទាំង៥នាក់ ដែលបានវាយជនបរទេសអោយរងរបួសធ្ងន់ និងថែមទាំងចាប់រំលោភនារីរងគ្រោះផងនោះ គឺមានឈ្មោះ ១ ចឺន ភេទប្រុស អាយុ២៥ឆ្នាំ ២ យីម ភេទប្រុស អាយុ២៥ឆ្នាំ ៣ ផៃ ភេទប្រុស អាយុ២២ឆ្នាំ ៤ បុត ណាម ភេទប្រុស អាយុ២០ឆ្នាំ និង៥ឈ្មោះ ធី ភេទប្រុស អាយុ២០ឆ្នាំ ។
បច្ចុប្បន្នកម្មករទូកនេសាទ្រខ្មែរទាំង៥នាក់ ត្រូវកំលាំងតម្រួតថៃនាំខ្លួនយកទៅសាកសួរ និងបន្តតាមនិតិវិធីច្បាប់ ៕
ដោយ៖ សំវិច្ឆិកា
