ភ្នំពេញ ៖ បន្ទាប់ពីមានករណីកាប់ប្លន់យកម៉ូតូមួយគ្រឿងបានសម្រេចនៅយប់ថ្ងៃទី១ ខែមីនា ២០២១ថ្មីៗកន្លងទៅនេះ ដែលស្ថិតនៅចំណុចជិតក្លឹបសេះមាស តាមផ្លូវបេតុង ស្ថិតនៅភូមិដីថ្មី សង្កាត់ស្ទឹងមានជ័យទី៣ ខណ្ឌមានជ័យ ស្រាប់តែស្អែកឡេីងនៅថ្ងៃទី២ខែឆ្នាំដដែល លោកវរសេនីយ៍ឯក ម៉េង វិមានតារា អធិការនគរបាលខណ្ឌមានជ័យ បានបញ្ចារកម្លាំងជំនាញព្រហ្មទណ្ឌខណ្ឌសហការជាមួយលោកវរសេនីយ៍ត្រី ឯម ភារី នាយប៉ុស្តិ៍រដ្ឋបាលស្ទឹងមានជ័យទី៣ ដឹកនាំកម្លាំងធ្វេីការស្រាវជ្រាវឃាត់ខ្លួនជនសង្ស័យប្រុសស្រី៣នាក់ក្នុងចំណោមបក្ខពួក៧នាក់ដែលពាក់ព័ន្ធធ្វើសកម្មភាពវ៉ៃប្លន់យកម៉ូតូ ។
លោកវរសេនីយ៍ត្រី ឯម ភារី នាយប៉ុស្ដិ៍រដ្ឋបាលស្ទឹងមានជ័យ៣ បានបង្ហេីបប្រាប់ថា ជនសង្ស័យទាំង៣ នាក់ដែលត្រូវឃាត់ខ្លួនរួមមាន ៖ ទី១ឈ្មោះស្រី អន អាយុ ៣០ឆ្នាំមុខរបរមិនពិតប្រាកដស្នាក់នៅផ្ទះជួល ។ ទី២ ឈ្មោះ បុិល ឡែន អាយុ៣៧ឆ្នាំមុខរបរមិនពិតប្រាកដ ។ និងទី៣ ឈ្មោះឈីម កេត អាយុ ២៧ឆ្នាំមុខរបរមិនពិតប្រាកដអ្នកទាំង៣នាក់ស្នាក់នៅផ្ទះជួលភូមិដំណាក់ធំ ២សង្កាត់ស្ទឹងមានជ័យ៣ ខណ្ឌមានជ័យ
រីឯជនរងគ្រោះឈ្មោះកាន់ កុសល ភេទប្រុសអាយុ២៤ឆ្នាំ មុខរបរ កម្មកររោងចក្រកាត់ដេរ ស្នាក់នៅបន្ទប់ជួល សង្កាត់បឹងទំពន់១ ខណ្ឌមានជ័យ និងមានស្រុកកំណេីតនៅស្រុកទ្រាំង ខេត្តតាកែវ។
លោកវរសេនីយ៍ត្រី ឯម ភារី បានបញ្ជាក់ថា កាលវេលាម៉ោង១និង៣០នាទីរំលងអាធ្រាត្រឈានចូលចូលថ្ងៃទី១ ខែ មិនា ឆ្នាំ ២០២១ ជនរងគ្រោះបានជិះម៉ូតូម៉ាកHONDA BEATពណ៍ខៀវពាក់ស្លាកលេខភ្នំពេញ1HN-8376 ចេញពីផឹកសុីជាមួយមិត្តភ័ក្រ្តគោលបំណងត្រលប់ទៅផ្ទះតែពេលជិះមកដល់ចំណុចជិតក្លឹបសេះមាស តាមផ្លូវបេតុង ស្ថិតនៅភូមិដីថ្មី សង្កាត់ស្ទឹងមានជ័យទី៣ ខណ្ឌមានជ័យ ក៏មាននារីវ័យក្មេងម្នាក់បក់ដៃហៅពេលនោះជនរងគ្រោះក៏បានឈប់ហើយចៃដន្យមានមិត្តភ័ក្រ្តទូរស័ព្ទមកផងក៏ឈប់ម៉ូតូមិនទាន់បានលើកនិយាយផងមានជនសង្ស័យចំនួន២នាក់ជិះម៉ូតូម៉ាកហុងដាឌ្រីមសង់មិនចាំស្លាកលេខមកពីក្រោយប្រដាប់ដោយដាវក៏កាប់ប្រហាចំក្បាលបណ្តាលឲ្យរងរបួសធ្ងន់រួចប្លន់យកម៉ូតូគេចខ្លួនបាត់ស្រមោលតែម្តង ហើយជនរងគ្រោះត្រូវបានប្រជាពលរដ្ឋប្រទះឃើញដេកដួលហូរឈាមទើបប្ដឹងសមត្ថកិច្ច ។
ក្រោយកើតហេតុបានទទួលព័ត័មានពីប្រជាពលរដ្ឋថាប្រទះឃើញបុរសម្នាក់ដួលសន្លប់ករណីមានជនសង្ស័យវាយប្លន់យកម៉ូតូ ហើយបានចុះទៅដល់កន្លែងកើតហេតុក៏មានរថយន្តសង្រ្គោះគ្លីនិកឯកជនដឹកយកទៅព្យាបាលដោយជនរងគ្រោះរបួសធ្ងន់មិនទាន់សួរនាំលុះព្រឹកថ្ងៃទី១ខែ ឆ្នាំដដែលជនរងគ្រោះនិងក្រុមគ្រួសារបានមកដាក់ពាក្យបណ្ដឹងនៅប៉ុស្តិ៍រដ្ឋបាលស្ទឹងមានជ័យទី៣ដើម្បីអោយសមត្ថកិច្ចតាមស្រាវជ្រាវរកចាប់ជនសង្ស័យធ្វើសកម្មភាពវាយប្លន់យកម៉ូតូអ្នករងគ្រោះ ។
ក្រោយពីទទួលបានពាក្យបណ្ដឹងពីជនរងគ្រោះ កម្លាំងសមត្ថកិច្ចនគរបាលព្រហ្មទណ្ឌខណ្ឌមានជ័យសហការជាមួយកម្លាំងនគរបាលប៉ុស្តិ៍រដ្ឋបាលស្ទឹងមានជ័យទី ៣ធ្វេីការស្រាវជ្រាវក្ដាប់មុខសញ្ញានិងបានឈានទៅធ្វើការឃាត់ខ្លួនជនសង្ស័យប្រុសស្រី៣នាក់នៅក្នុងបន្ទប់ជួលចំណែកបក្ខពួក៤នាក់ទៀតបានរត់គេចខ្លួនបាត់ស្រម៉ោល ។
បច្ចុប្បន្ននេះ ជនសង្ស័យប្រុសស្រី ៣នាក់ខាងលេីត្រូវបានសមត្ថកិច្ចប៉ុស្តិ៍នគរបាលរដ្ឋបាលស្ទឹងមានជ័យទី៣បានកសាងសំណុំរឿងបញ្ជូនទៅអធិការដ្ឋានខណ្ឌមានជ័យដើម្បីចាត់ការបន្ត។ ចំណែកបក្ខពួក៤នាក់ដែលនៅសេសសល់ កម្លាំងសមត្ថកិច្ចជំនាញកំពុងធ្វើការស្រាវជ្រាវចាប់យកមកផ្តន្ទាទោសទៅតាមច្បាប់ ៕
ដោយ៖ ភារ៉ា ដង្កោ
