ខេត្តត្បូងឃ្មុំ ៖ លោកឧត្តមសេនីយ៍ត្រី ម៉ុន មាគ៌ា ស្នងការនៃស្នងការដ្ឋាននគរបាលខេត្តត្បូងឃ្មុំ បានអញ្ជើញដឹកនាំប្រតិភូចុះសួរសុខទុក្ខ សំណេះសំណាល និងត្រួតពិនិត្យកម្លាំងនគរបាលដែលកំពុងឈរជើងការពារការលួចឆ្លងដែនខុសច្បាប់ និងការទប់ស្កាត់ការរីករាលដាលជំងឺកូវីដ-១៩ នៅតាមបណ្តាប៉ុស្តិ៍នគរបាលការពារព្រំដែនគោកចំណុះវរសេនាតូចនគរបាលការពារព្រំដែនគោកលេខ៦១៧ ។
ការចុះពិនិត្យនិងសំណេះសំណាលសួរសុខទុក្ខកម្លាំងសមត្ថកិច្ចនៅរសៀលថ្ងៃទី១០ ខែមីនា ឆ្នាំ២០២១ម្សិលមិញនេះ រួមមាន៖ ១.ប៉ុស្ដិ៍នគរបាលការពារព្រំដែនគោកស្ពានជ្រាវ, ២.ប៉ុស្ដិ៍នគរបាលការពារព្រំដែនគោកកោះថ្ម, ៣.ប៉ុស្ដិ៍នគរបាលការពារព្រំដែនថ្មតាដោក, ៤.ប៉ុស្ដិ៍ច្រកទ្វារទ្វេភាគីទន្លេចាមនិង៥.ប៉ុស្ដិ៍នគរបាលការពារព្រំដែនជាំក្រវៀន ។
ក្នុងឱកាសនោះលោកឧត្ដមសេនីយ៍ស្នងការ បានមានប្រសាសន៍ផ្ដាំផ្ញើឱ្យកងកម្លាំងដែលកំពុងឈរជើងការពារនៅតាមខ្សែបន្ទាត់ព្រំដែន ត្រូវយកចិត្តទុកដាក់ខ្ពស់ចំពោះកិច្ចការងារ និងភារកិច្ចរបស់ខ្លួន ជាពិសេសកងកម្លាំងដែលដើរល្បាតត្រូវផ្លាស់ប្តូរវេនគ្នាជាប្រចាំតាមសភាពការណ៍ជាក់ស្តែង និងត្រូវការពារទប់ស្កាត់ការឆ្លងរីករាលដាលជំងឺកូវីដ-១៩ ស្របតាមវិធានការរបស់ក្រសួងសុខាភិបាល ៕
ដោយ, វណ្ណៈ
