ខេត្តឧត្តរមានជ័យ៖
កម្លាំងកងរាជអាវុធហត្ថស្រុកអន្លង់វែង ឃាត់ខ្លួនបុរសជនជាតិវៀតណាម ២នាក់ ជាឪពុក និងកូន ដែលកំពុងធ្វើសកម្មភាពចែកចាយគ្រឿងញៀន កាលពីវេលាម៉ោង១២ ថ្ងៃទី១៦ ខែកក្កដា ឆ្នាំ២០១៥ នៅក្បែរច្រកអន្តរជាតិជាំសាង៉ាំ ស្ថិតនៅភូមិជើងភ្នំ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ។
ប្រតិបតិ្តការនេះ ដឹកនាំបញ្ជាផ្ទាល់ដោយ លោក ងួន ទ្ធីរិទ្ធ មេបញ្ជាការកងរាជអាវុធហត្ថ ស្រុកអន្លង់វែង ចុះបង្ក្រាប និងឃាត់ខ្លួន បានជនសង្ស័យចែកចាយថ្នាំញៀន២ នាក់ ជាជនជាតិវៀតណាម ដែលកំពុងស្នាក់នៅផ្ទះ ក្នុងជួលមួយកន្លែង ស្ថិតនៅភូមិឃុំខាងលើ។ ទី១.ឈ្មោះ ចូវ យ៉ាងវៀង អាយុ៤៦ ឆ្នាំ ជាឪពុក និងទី២.ជាកូនបង្កើតឈ្មោះ ចូវ យ៉ាងឌែង ភេទប្រុស អាយុ១៧ឆ្នាំអ្នកទាំង ២នាក់ ពុំមានលិខិតស្នាមស្នាក់នៅជ្រកកោណនោះទេ។ ហើយបានដកហូតបានថ្នាំញៀនប្រភេទ WY ២២ គ្រាប់ កាំភ្លើងប្រភេទច្នៃ ២ដើម ដាវ១ កាំបិតស្នៀត១ រួមនឹងសំភារៈជក់ថ្នាំញៀនមួយចំនួនទៀត។ បន្ទាប់ពីធ្វើការឃាត់ខ្លួន កម្លាំងកងរាជអាវុធហត្ថស្រុកអន្លង់វែង បានកសាងសំណុំរឿងបញ្ជូនជនសង្ស័យជនជាតិទាំង ២នាក់ ទៅតុលាកាខេត្តចាត់ការតាមនិតិវិធីច្បាប់។
លោក ងួន ទ្ធីរិទ្ធ មេបញ្ជាការកងរាជអាវុធហត្ថស្រុកអន្លង់វែង បានឱ្យដឹងថា ករណីបង្ក្រាបបានជនជាតិវៀតណាម ២នាក់ បន្ថែម គឺបន្ទាប់ពីធ្វើការស្រាវជ្រាវទៅចំលើយ ពីជនសង្ស័យជួញដូរ និងប្រើប្រាស់គ្រឿងញៀន ចំនួន ១៦នាក់ ដែលបង្ក្រាបបានកាលពីថ្ងៃទី១៣ ខែកក្កដា ឆ្នាំ២០១៥។ ក្នុងនោះដែរ លោកក៏បានថ្លែងអំណរគុណដល់ ឯ.ស ថាវី អភិបាលខេត្តឧត្តរមានជ័យ ដែលបានយកចិត្តទុកដាក់ឧបត្ថម្ភជាថវិកាលើកទឹកចិត្តចំនួន ២លានរៀល ដល់កម្លាំងកងរាជអាវុធហត្ថរបស់លោក។
ប្រជាពលរដ្ឋទូទៅរស់នៅក្នុងស្រុកអន្លង់វែង ជាពិសេសប្រជាពលរដ្ឋ ដែលមានកូនស្ថិតនៅក្នុងវ័យ កំពុងតែសេបគ្រឿងញៀន បានសំដែងសាទរ ថ្លែងអំណគុណដល់កម្លាំងអាវុធហត្ថ ដែលបំបែកសំបុកចែកចាយ និងជួញដូរគ្រឿងញៀន ដែលកន្លងមកពួកគាត់មានការព្រួយបារម្មណ៍រឿងអសុវត្ថិភាពនៅក្នុងភូមិឃុំរបស់ពួកគាត់។
