ក្រុមជម្រើសជាតិបារាំងដែលជាអតីតម្ចាស់ជើងឯកពិភពលោកត្រូវបានក្រុមជម្រើសជាតិអ៊ុយក្រែនធ្វើឱ្យមានការភ្ញាក់ផ្អើលយ៉ាងខ្លាំងនៅពេលដែលពួកគេទទួលបានយុទ្ធនាការជម្រុះ World Cup ឆ្នាំ ២០២២ ដោយលទ្ធផល១ទល់១។ យោងតាមការចេញផ្សាយរបស់ BBC Sport បានឲ្យដឹងថា ម្ចាស់ជើងឯកពិភពលោកបារាំងបានចាប់ផ្តើមប្រកបដោយភាពជឿជាក់ និងសមនឹងទទួលបានជ័យជម្នះនៅពេលដែលខ្សែប្រយុទ្ធ Antoine Griezmannរកបាន១គ្រាប់នាំមុខទៅលើក្រុមភ្ញៀវអ៊ុយក្រែនដោយស៊ុតជើងឆ្វេងក្នុងចម្ងាយឆ្ងាយចូលទីយ៉ាងល្អនៅនាទីទី១៩។

ទោះយ៉ាងណាអ៊ុយក្រែនបានរក្សាការពារយ៉ាងរឹងមាំ និងបានតាមស្មើនៅពេលដែលកីឡាករ Serhiy Sydorchuk បានទាត់ផ្លាតចំជើងកីឡាករបារាំង Kimpembe ធ្វើឲ្យអ្នកចាំទីបារាំង Hugo Lloris ចាប់មិនបានដែលជាបាល់ទាត់ចូលទីខ្លួនឯង។

នៅក្នុងការប្រកួតជម្រុះពូល D ផ្សេងទៀតកាលពីរាត្រីថ្ងៃពុធឈានចូលថ្ងៃព្រហស្បតិ៍គឺហ្វាំងឡង់ស្មើជាមួយប៊ូស្នៀ២ទល់២។ ខ្សែប្រយុទ្ធឆ្នើមរបស់ Norwich កីឡាករ Teemu Pukki រកបាន២គ្រាប់ឲ្យក្រុមម្ចាស់ផ្ទះហ្វាំងឡង់ ប៉ុន្តែកីឡាករ Miroslav Stevanovic និងខ្សែការពារ MiralemPjanic របស់ក្រុម Barcelona រកបានម្នាក់១គ្រាប់សងវិញ ធ្វើឲ្យលទ្ធផលស្មើគ្នា។

សម្រាប់ការប្រកួតវគ្គជម្រុះ World Cup 2022 នេះគឺទើបតែចាប់ផ្តើមទេ ដោយបារាំងស្ថិតក្នុងពូលD ជាមួយក្រុម អ៊ុយក្រែន, ហ្វាំងឡង់, ប៊ូស្នៀ និងកាហ្សាក់ស្ថាន។ សម្រាប់វគ្គបន្តបារាំងត្រូវប៉ះក្រុមម្ចាស់ផ្ទះកាហ្សាក់ស្ថាន ខណៈអ៊ុយក្រែនត្រូវស្វាគមន៍ក្រុមភ្ញៀវហ្វាំងឡង់ ដែលនឹងត្រូវប្រកួតនៅថ្ងៃទី២៨ ខែមីនាខាងមុខនេះ។ ប្រកួតជម្រុះនេះគឺមានតែ១ក្រុមគត់ដែលឈរកំពូលតារាងក្នុងពូលមានកៅអីស្វ័យប្រវត្តិទៅប្រកួតនៅប្រទេសកាតា ខណៈក្រុមចំណាត់ថ្នាក់លេខ២ក្នុងពូលត្រូវប្រកួត Play-off ដើម្បីស្វែងរកកៅអីទៅប្រកួតនៅប្រទេសកាតាដែរ៕ដោយ៖ ភារៈ

រូបភាព​៖bbc sport