ភ្នំពេញ ៖ កម្លាំងសមត្ថកិច្ចកងអន្តរាគមន៍ពិសេសSDU នៃស្នងការដ្ឋានរាជធានីភ្នំពេញ សហការជាមួយសមត្ថកិច្ចប៉ុស្តិ៍ទន្លេបាសាក់ ព្រមទាំងសន្តិសុខកោះពេជ្របានធ្វេីការឃាត់ខ្លួនក្រុមក្មេងទំនេីងជាច្រេីននាក់ ដែលប្រមូលផ្ដុំគ្នានៅក្នុងកោះពេជ្រ ដេីម្បីធ្វេីការអប់រំណែនាំ ក្នុងគោលបំណងចូលរួមបង្ការ ទប់ស្កាត់ ការរីករាលដាលនៃជំងឺកូវីដ-១៩ថ្មី ។
ប្រតិបត្តិការនេះបានធ្វេីឡេីងនៅវេលាម៉ោង១០យប់ថ្ងៃទី២៧ ខែមីនា ឆ្នាំ២០២១ ស្ថិតក្នុងបរិវេណកោះពេជ្រ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។
តាមប្រភពព័ត៌មានពីសមត្ថកិច្ចបានប្រាប់ឱ្យដឹងថា ដោយមានការរាយការណ៍ពីប្រជាពលរដ្ឋថា មានក្រុមក្មេងស្ទាវជាច្រេីននាក់និងម៉ូតូជាច្រេីនគ្រឿង មកពពាក់ពពូនប្រមូលផ្ដុំគ្នានៅក្នុងកោះពេជ្រជារៀងរាល់ថ្ងៃ ទេីបកម្លាំងកងអន្តរាគមន៍កិច្ចការពិសេសSDUនៃស្នងការដ្ឋានរាជធានីភ្នំពេញចុះមកឃាត់ខ្លួនក្រុមក្មេងទំនេីងដែលប្រមូលផ្ដុំពពាក់ពពូនគ្នានៅក្នុងកោះពេជ្រ ដោយសហការជាមួយកម្លាំងមូលដ្ឋានប៉ុស្តិ៍សង្កាត់ទន្លេបាសាក់និងសន្តិសុខកោះពេជ្របានឃាត់ខ្លួនក្រុមក្មេងទំនេីងប្រុសស្រីចំនួន៤៨នាក់ក្នុងនោះមានស្រី៥នាក់ និងម៉ូតូចំនួន២៥គ្រឿង មកធ្វេីការអបរំណែនាំឱ្យស្របតាមសារាចរណែនាំរបស់រដ្ឋបាលរាជធានីភ្នំពេញដែលចេញសេចក្ដីណែនាំដល់កងកម្លាំង និងអាជ្ញាធរគ្រប់ខណ្ឌសហការគ្នាឱ្យបានជិតស្និទ្ធជាមួយមន្ត្រីសុខាភិបាល ដើម្បីអនុវត្តការផាកពិន័យអន្តរការណ៍លើបុគ្គល ឬ នីតិបុគ្គលដែលមិនអនុវត្តនូវកាតព្វកិច្ចពាក់ម៉ាស់ និង កាតព្វកិច្ចរក្សាគម្លាតសុវត្ថិភាព ក្នុងភូមិសាស្ត្ររាជធានីភ្នំពេញ។
បន្ទាប់មក សមត្ថកិច្ចបានធ្វេីការអបរំណែនាំ និងឲ្យក្រុមក្មេងទំនេីងទាំងអស់នេះសន្យាថាបេីសិនថ្ងៃក្រោយក្រុមនេះមកប្រមូលផ្ដុំគ្នាទៀតបើសមត្ថកិច្ចចាប់បានមានមុខដដែលៗ សមត្ថកិច្ចនិឹងអនុវត្តតាមនិីតិវិធីច្បាប់ដោយមិនមានការលេីកលែងឲ្យទៀតឡើយ។ ក្រោយមកសមត្ថកិច្ចបានឲ្យក្រុមក្មេងៗទំនើងទាំងអស់នោះត្រឡប់ទៅផ្ទះវិញ ដោយឲ្យពួកគេចូលរួមគោរពវិធានការការពារកូវីដ-១៩ គឺ៣កុំ ៣ការពារ របស់រាជរដ្ឋាភិបាល និងការណែនាំរបស់ក្រសួងសុខាភិបាលផងដែរ៕
ដោយ ៖ ជីម ភារ៉ា
