ភ្នំពេញ៖ ទើបតែរាប់អានគ្នាជាមិត្តភក្តិដំបូងក៏ស្រាប់តែបបួលគ្នាទៅកាច់កម៉ូតូគេ រួចជិះរត់គេចពីចំណុចផ្លូវលេខ២៧១ ម្តុំមន្ទីរពេទ្យមិត្តភាពខ្មែរ-សូវៀតនិងបន្តជិះគេចខ្លួនពេញទីក្រុងភ្នំពេញ។

ហេតុការណ៍នេះបានកើតឡើងនៅវេលាម៉ោង២កន្លះរំលងអធ្រាត្រ ឈានចូលថ្ងៃទី១ ខែមេសា ឆ្នាំ២០២១ ហើយទីតាំងឃាត់ខ្លួនជនសង្ស័យ ស្ថិតនៅក្បែរផ្លូវបំបែកលេខ៣១០ កែងមហាវិថីព្រះមុនីវង្ស ដោយម៉ូតូដែលជនសង្ស័យបានលួចគឺម៉ាកហុងដាឌ្រីម សេ១២៥ ពណ៌ខ្មៅ ពាក់ស្លាកលេខ ព្រៃវែង 1M-4714។

នៅក្នុងហេតុការណ៍ខាងលើនេះ សមត្ថកិច្ចបានទាក់ទងគ្នាតាមរយៈវិទ្យុទាក់ទងដើម្បីសហការគ្នាដេញតាមឃាត់ខ្លួនជនសង្ស័យដែលបានលួចកាច់កម៉ូតូគេហើយព្យាយាមរត់គេច តែមិនបានសម្រេច ត្រូវអស់លក្ខណ៍នៅត្រង់ចំណុចវិថីព្រះមុនីវង្សក្បែរផ្លូវបំបែកលេខ៣១០។

ក្រោយពេលឃាត់ខ្លួន ជនសង្ស័យបានឱ្យដឹងថា ខ្លួនដាច់លុយពេក ទើបធ្វើសកម្មភាពលួចម៉ូតូគេ ប៉ុន្តែខ្លួនមិនបានលួចទេ គឺមិត្តភក្តិចំនួន២នាក់ដែលទើបរាប់អានគ្នាបានប៉ុន្មាននាទីជាអ្នកបបួល។ ខណៈលួចបានទើបឱ្យជនសង្ស័យជិះរត់គេច ហើយត្រូវសមត្ថកិច្ចតាមស្ទាក់ចាប់បាននៅទីតាំងខាងលើតែម្តង។

បន្ទាប់ពីកើតហេតុ សមត្ថកិច្ចបាននាំខ្លួនជនសង្ស័យទៅកាន់ប៉ុស្តិ៍បឹងទំពុនដើម្បីធ្វើការសាកសួរ និងស្រាវជ្រាវរកជនសង្ស័យ២នាក់ទៀតមកចាត់ការតាមនីតិវិធីច្បាប់ផងដែរ៕

ជ្រោយពេជ្រ