ភ្នំពេញ៖ ប្រជាពលរដ្ឋចំនួន៧គ្រួសារដែលនាំគ្នាទៅសាងសង់លំនៅដ្ឋានលើដីច្រាំងទន្លេរបស់រដ្ឋដោយខុសច្បាប់ត្រូវបានអាជ្ញាធរចុះទៅហាមឃាត់និងតំរូវអោយរុះរើចេញវិញដោយខ្លួនឯង បើមិនអនុវត្តតាមការណែនាំទេនោះគណៈបញ្ជាការឯកភាពខណ្ឌនិងចុះទៅរុះរើដោយមិនទទួលខុសត្រូវរាល់ការខូចខាតបាក់បែកនោះឡើយ ។
សកម្មភាពចុះហាមឃាត់និងតម្រូវអោយម្ចាស់រុះរើចេញដោយខ្លួនឯង នេះបានធ្វើឡើងនៅព្រឹកថ្ងៃទី០២ ខែមេសា ឆ្នាំ២០២១ ដឹកនាំដោយអភិបាលរងខណ្ឌ២រូប រួមមានលោក ណុប ផា និង លោក ហ៊ត គឹមនី ។
តាមប្រភពពីលោក យ៉ិន វុធ ចៅសង្កាត់ច្បារអំពៅទី២ បានឲ្យដឹងថា នៅថ្ងៃទី០២ ខែមេសានេះកម្លាំងគណៈបញ្ជាការឯកភាពខណ្ឌច្បារអំពៅ ដឹកនាំដោយលោកអភិបាលរងខណ្ឌពីររូប គឺលោក ណុប ផា និងលោក ហ៊ត គឹមនី បានដឹកនាំកម្លាំងចម្រុះចុះទៅទីតាំងដីច្រាំងទន្លេ ស្ថិតនៅភូមិដើមចាន់១ សង្កាត់ច្បារអំពៅទី២ ខណ្ឌច្បារអំពៅ រាជធានីភ្នំពេញ ខណៈដែលមានប្រជាពលរដ្ឋចំនួន៧គ្រួសារនាំគ្នាមកសាងសង់លំនៅដ្ឋានដោយខុសច្បាប់លើដីរបស់រដ្ឋ ដែលស្ថិតនៅក្នុងគំរោងធ្វើច្រាំងទន្លេនាពេលឆាប់ៗខាងមុខ។
លោក បានបន្តថា មិនដឹងជាពួកគាត់យល់យ៉ាងដូចម្តេច ទើបនាំគ្នាមកសង់លំនៅដ្ឋានលើដីរបស់រដ្ឋបែបនេះ។ ក្នុងនោះលោកអភិបាលរងខណ្ឌទាំងពីររូបបានសម្រេចឲ្យប្រជាពលរដ្ឋទាំង៧គ្រួសាររុះរើ រោងឈើ របស់ខ្លួនចេញពីលើដីរដ្ឋ ដោយមិនពន្យារពេលឡើយ ហើយបើរឹងទទឹងគឺអាជ្ញាធរនឹងចុះរុះរើដោយមិនទទួលខុសត្រូវលើការខូចខាតសម្ភារៈនេះឡើយ៕
ដោយ៖ សណ្តោស
