កាលពីថ្ងៃទី៤ ខែមីនា ឆ្នាំ២០១៦ នៅក្នុងប្រទេសទួរគីមានការវាយប្រហារគ្រាប់បែកក្នុងរថយន្តអត្តឃាតបានបណ្តាលឲ្យស្លាប់ប៉ូលិស២នាក់ និង៣៥នាក់ផ្សេងទៀតរងរបួសធ្ងន់ ស្រាល ។
ប្រភពព័ត៌មានចេញផ្សាយបឋមបានបញ្ជាក់ថា ការបំផ្ទុះរថយន្តអត្តឃាតបានកើតឡើងស្ថិតនៅភាគខាងត្បូងទួរគី ខេត្ត Mardin កាលពីថ្ងៃទី៤ ខែមីនា ។ ការវាយប្រហារភេរវកម្មនេះ ត្រូវគេដឹងថា ជាទង្វើរបស់ក្រុមឧទ្ទាមជនជាតិឃើដ។
ពុំមានព័ត៌មានលម្អិតទាក់ទងការវាយប្រហារភេរវកម្មខាងលើនេះឡើយ ។ ប៉ុន្តែប្រភពពីមន្ត្រីសន្តិសុខទួរគីបានបញ្ជាក់ថា ទង្វើវាយប្រហារភេរវកម្មនេះធ្វើឡើងដោយក្រុមឧទ្ទាម PKK (គណបក្សពលករឃើដ) ដែលស្ថិតនៅក្នុងទីប្រជុំជន Nusaybin ជាប់ព្រំដែនជាមួយប្រទេសស៊ីរី ។
ការវាយប្រហារភេរវកម្មនៅទួរគី មួយរយៈពេលចុងក្រោយនេះបានកើតឡើងជាបន្តបន្ទាប់ ។ គោលដៅក្នុងការវាយប្រហារភាគច្រើនសំដៅទៅលើកងកម្លាំងសន្តិសុខរដ្ឋាភិបាល ។ ប្រធានាធិបតីទួរគី លោក Recep Tayyip Erdogan កាលពីពេលថ្មីៗកន្លងមកនេះ បានបញ្ជាក់ថា រដ្ឋាភិបាលបានប្តេជ្ញាបន្តសកម្មភាពប្រយុទ្ធប្រឆាំង និងកម្ទេចក្រុមឧទ្ទាមរហូតដល់ទីបញ្ចប់ ។
គួរបញ្ជាក់ថា កាលពីថ្ងៃទី១៧ ខែកុម្ភៈ ឆ្នាំ២០១៦កន្លងទៅនេះ មនុស្ស២៨នាក់បានបាត់បង់ជីវិត និង៦១នាក់ផ្សេងទៀតបានរងរបួស ក្នុងហេតុការណ៍វាយប្រហារភេរវកម្ម គឺការបំផ្ទុះគ្រាប់បែកក្នុងរថយន្តអត្តឃាតក្នុងទីក្រុង Ankar ប្រទេសទួរគីតែម្តង ។ ការវាយប្រហារនោះបានធ្វើឲ្យប្រមុខដឹកនាំរដ្ឋាភិបាលទួរគីរន្ធត់ចិត្តជាខ្លាំង ពីព្រោះវាយបានគោលដៅទៅលើក្បួនរថយន្តរបស់កងកម្លាំងយោធាចរាចរណ៍នៅក្នុងទីក្រុងនោះតែម្តង ៕
ប្រែសម្រួល៖ ថាច់ យ៉ាត