ខេត្តពោធិ៍សាត់ ៖ អគ្គិភ័យឆាបឆេះផ្ទះមួយខ្នងអស់ទាំងស្រុង បណ្ដាលឲ្យជីដូនចាស់ជរាព្រះជន្មាយុប្រមាណជិត១០០ឆ្នាំ បានស្លាប់បាត់បង់ជីវិតយ៉ាងអាណោចអាធម័ និងមានអារម្មណ៍ក្ដុកក្ដួលយ៉ាងក្រៃលែង ដោយពុំមានគេដឹងអំពីមូលហេតុច្បាស់លាស់នោះឡើយ ។
ហេតុការណ៍គ្រោះអគ្គិភ័យមហាសែនរន្ធត់ខាងលើងនេះ បានបង្កការភ្ញាក់ផ្អើលឡើងនៅវេលាម៉ោង៣ និង៣០នាទី រសៀលថ្ងៃព្រហស្បតិ៍ ៨រោច ខែចេត្រ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី៨ ខែមេសា ឆ្នាំ២០២១ ស្ថិតនៅភូមិពោធិ៍ដំណាក់ ឃុំវាល ស្រុកកណ្ដៀង ខេត្តពោធិ៍សាត់ ។
ប្រភពព័ត៌មាននានាជុំវិញកន្លែងកើតហេតុបានឲ្យដឹងថា ជីដូនចាស់ជរារងគ្រោះឈ្មោះ រំដួល សួន អាយុ ៩៦ឆ្មាំ ជនជាតិខ្មែរ រស់នៅម្នាក់ឯង គ្មានបងប្អូន.កូនចៅ បានញាតិក្បែខាងឬអាជ្ញាធរជួយឧបត្ថមក្នុងការហូបចុក ក្នុងផ្ទះដ៍កម្សត់របស់គាត់ទំហំ ៤ម៉ែត្រ គុណនឹង៥ម៉្រែត្រ ដំបូលប្រក់ស័ង្កសី ជញ្ជាំងបាំងស័ង្កសី និងក្ដា រនាបក្រាលក្ដា គាត់រស់នៅដីញាតិក្បែខាងគ្នា ។
ប្រភពនានាដដែលបន្តទៀតថា បញ្ហាអគ្គីភ័យឆាបឆេះ ផ្ទះដូនចាស់អស់ទាំងស្រុងរួមទាំងរូបគាត់យ៉ាងរន្ធត់នេះ គ្មានអ្នកណាបានដឹងអំពីមូលហេតុច្បាស់លាស់នោះទេ ប៉ុន្តែធម្មតាឲ្យតែរសៀលគាត់ដាំបាយឬដាំទឹក ដូច្នេះហើយទើបគេសន្ថិដ្ឋានអាចបណ្ដាលមកពីភ្លើងចង្រ្កាន ។
ដោយឡែកៈ ប្រភពព័ត៌មានពីសមត្ថកិច្ចនគរបាលស្រុកកណ្ដៀងបានឲ្យដឹងដែរថា ករណីអគ្គីភ័យឆាបឆេះផ្ទះដូនចាស់ជរារួមទាំងស្លាប់រូបគាត់ក្នុងភ្នក់ភ្លើងយ៉ាងរន្ធត់នេះ បានប្រើប្រាសរថយន្តពន្លត់អគ្គីភ័យ របស់អធិការដ្ឋាននគរបាលស្រុកកណ្ដៀង និងស្នងការដ្ឋាននគរបាលខេត្តចំនួន២គ្រឿង ដើម្បីជួយអន្តរាគមន៍ ប៉ុន្តែស្ថានភាពផ្លូវតូចចង្អៀតពុំជួយអន្តរាមន៍ទាន់ពេលវេលានោះទេ ហើយមូលហេតុអាចបណ្ដាលមកពីភ្លើងចង្រ្កាន បច្ចុប្បន្ន សពលោកយាយប្រគល់ជូនញាតិឈ្មោះ ហង់ វណ្ណា ភេទប្រុស អាយុ ៤៣ឆ្នាំ ជនជាតិខ្មែរ ដើម្បីចាត់ចែងធ្វើបុណ្យតាមប្រពៃណី ៕
ដោយ៖ បុឹម ពិន
