ភ្នំពេញៈសាខាកាកបាទក្រហមកម្ពុជា រាជធានីភ្នំពេញ ដឹកនាំដោយ លោកស្រី អនុប្រធានកិត្តិយសសាខា បានចុះសំណេះសំណាលសាកសួរសុខទុក្ខ និងរៀបចំបាយម្ហូបជូនដល់កុមារ រស់នៅជាមួយមេរោគអេដស៍-ជំងឺអេដស៍ កុមារកំព្រា កុមារពិការ សរុបប្រមាណជាង៥០០នាក់ នៅអគារផ្កាម្លិះគាំទ្រចិត្តសាស្រ្តសង្គម របស់សាខាកាកបាទក្រហមកម្ពុជា រាជធានីភ្នំពេញ ដែលស្ថិតនៅភូមិបាយាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ កាលពីព្រឹកថ្ងៃទី៥ ខែមិនា ឆ្នាំ២០១៦ ។

លោកស្រីអនុប្រធានកិត្តិយស បានលើកទឹកចិត្តដល់កុមារទាំងអស់ សូមកុំមានការអស់សង្ឃឹម ក្មួយៗមិនឯកោទេ គឺនៅមានរាជរដ្ឋាភិបាល ជាពិសេសកាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៉ុន រ៉ានី ហ៊ុនសែន ជាប្រធាន នៅចាំជួយ និងយកចិត្តទុកដាក់គិតគូរដល់ក្មួយៗជានិច្ច ។

បន្ទាប់ពីចប់កម្មវិធី ក៏មានការផ្តល់ជូននូវអំណោយដែលកុមារម្នាក់ៗទទួលបាន ៖
ឃីត១ក្នុងនោះមាន (ទឹកបរិសុទ្ធឱរ៉ាល់, មី, ទឹកដោះគោ, ទឹកក្រូច, នំហាណាមិ, ខោអាវ១កំប្លេរ ) និងថវិកាចំនួន២ម៉ឺនរៀល ៕

ដោយ៖ សុខ ខេមរា