សារព័ត៌មាន Taiwan News បានដកស្រង់ប្រភពព័ត៌មានពីក្រុមការពារកោះតៃវ៉ាន់ដែលបានឱ្យដឹងថា នៅថ្ងៃទី១៣ខែមេសា មានយន្តហោះចិនដល់ទៅ២៥គ្រឿង បានហោះហើរចូលក្នុងដែនអាកាស ADIZ របស់កោះតៃវ៉ាន់ ។

តាមសារព័ត៌មានខាងលើក្នុងចំណោមយន្តហោះទាំងនោះ មាន១៤គ្រឿងជាប្រភេទ Shenyang J-16 , ៤គ្រឿងប្រភេទ Chengdu J-10 និង ៤គ្រឿងទៀតជាយន្តហោះទម្លាក់គ្រាប់បែករយៈចម្ងាយឆ្ងាយ Xian H6 …។

នៅវេលាម៉ោង៩ព្រឹក ថ្ងៃទី១៣ខែមេសានេះដែរ បណ្តាញគ្រប់គ្រងដែនសមុទ្រចិនខាងត្បូង បានឱ្យដឹងថា មាននាវាផ្ទុកយន្តហោះ USS Theodore Roosevelt របស់អាមេរិក បង្ហាញវត្តមាននៅក្បែកោះ Luzon ភាគខាងជើងហ្វីុលីពិីន។ លុះ២ម៉ោងក្រោយមកនាវាផ្ទុកយន្តហោះនោះធ្វើដំណើរនៅសមុទ្រចិនខាងត្បូង ភាគខាងលិចកោះ Luzon ។ នាវាផ្ទុកយន្តហោះរបស់អាមេរិកនឹងចូលរួមធ្វើសមយុទ្ធរួមជាមួយកម្លាំងទាហានហ្វីុលីពីន ដែលមានឈ្មោះថាសមយុទ្ធ”Balikatan” អូសបន្លាយរយៈពេល២សប្តាហ៍។

កន្លងមក កម្លាំងទាហានជើងទឹកចិនបានបញ្ជូននាវាផ្ទុកយន្តហោះពីរគ្រឿងទៅកាន់សមុទ្រចិនខាងត្បូង។ តាមរូបភាពពីផ្កាយរណប Sentinel បានបង្ហាញថា នាវាផ្ទុកយន្តហោះរបស់ចិនបានទៅកាន់ប្រជុំកោះគ្រប់គ្រងដោយកោះតៃវ៉ាន់។

ចិនបានចាត់ទុកកោះតៃវ៉ាន់ គឺជាផ្នែកមួយនៃទឹកដីចិនមិនអាចកាត់ផ្តាច់បានឡើយ ។ មិនតែប៉ុណ្ណោះចិនបានព្រមានថានឹងប្រើហិង្សា វាយប្រហារប្រសិនបើកោះនេះប្រកាសឯករាជ្យផ្តាច់ខ្លួនចេញពីចិនដីគោកនោះ៕ ដោយ ៖សាធី

រូបភាព៖vietnamnet