មានប្រសាសន៍ទៅកាន់អ្នកគាំទ្ររាប់សិបពាន់នាក់នៅទីក្រុងTirana ក្រោយការបោះឆ្នោតពីរថ្ងៃ នាយករដ្ឋមន្ត្រី Albania លោក Edi Rama បានអរគុណដល់អ្នកគាំទ្រ ដែលបន្តបោះឆ្នោតគាំទ្ររូបលោក។
សារព័ត៌មាន AFP នៅថ្ងៃទី២៧ខែមេសា បានឱ្យដឺងថា នាយករដ្ឋមន្ត្រី Edi Rama បញ្ជាក់ថា អ្នកដែលគាំទ្របានជួយលោកឱ្យទទួលបានជ័យជម្នះក្នុងអាណត្តិទី៣។ លោកបន្តទៀតថា «យើងបានបំបែកកំណត់ត្រា ប្រវត្តិសាស្ត្រ។ អរគុណពលរដ្ឋទាំងអស់គ្នាដែលជឿទុកចិត្ត ផ្តល់ឱកាសឲ្យខ្ញុំបន្តដឹកនាំបន្ថែម៤ឆ្នាំទៀត។
កាលពីខែឧសភាឆ្នាំ២០២០ បណ្តាគណបក្សនយោបាយនៅក្នុងប្រទេស Albania បានព្រមព្រៀង កែទម្រង់ច្បាប់បោះឆ្នោត ប្រកបដោយសេរីនិងយុត្តិធម៌។
កាលពីថ្ងៃទី២៥ខែមេសា កន្លងមក ពលរដ្ឋ Albania បាននាំគ្នាទៅបោះឆ្នោតសភាអាណត្តិថ្មី ក្នុងពេលដែលកំពុងប្រឈមវិបត្តិនយោបាយ រវាងបក្ខពួកនៅក្នុងប្រទេសនេះ។ នាយករដ្ឋមន្ត្រី Edi Rama បានខិតខំដើម្បីបន្តដឹកនាំប្រទេស អាណត្តិទីបី។ លោកក៏បានសន្យាថា នឹងលាលែងចេញពីតំណែង ប្រសិនបើមិនទទួលបានសំឡេងគាំទ្រភាគច្រើននោះទេ៕ ដោយ សាធី

រូបភាព៖ AP