ខេត្តស្វាយរៀង៖ មានករណីគ្រោះថ្នាក់ចរាចរណ៍ដ៏គួរឱ្យរន្ធត់មួយបានកើតឡើងខណៈដែលបុរសម្នាក់បានជិះម៉ូតូលឿនខ្វះការប្រុងប្រយ័ត្នជ្រុលទៅបុកត្រាក់ទ័រសណ្តោងរ៉ឺម៉កដែលបើកបញ្ច្រាសទិសគ្នាយ៉ាងពេញទំហឹងបង្កការភ្ញាក់ផ្អើលដល់អ្នកភូមិនិងអ្នកធ្វើដំណើររាយការណ៍ទៅសមត្ថកិច្ចដឹកយកទៅកាន់មន្ទីរពេទ្យបង្អែកជីភូភ្លាមៗ។

ហេតុការណ៏នេះបានកើតឡើងកាលពីវេលាម៉ោង៣និង៣៥នាទីរសៀល
ថ្ងៃទី២៣ ខែឧសភា ឆ្នាំ២០២១  ស្ថិត  នៅលើផ្លូវលេខ៣១៧B ក្នុងភូមិកំពោតម្រាក់ ឃុំពពែត ស្រុកស្វាយទាប ខេត្ត ស្វាយរៀង ។

សមត្ថកិច្ចនគរបាលស្រុកបានឱ្យដឹងថាបុរសរងរបួសមានឈ្មោះ មុំ មុន្នី អាយុ ២៩ឆ្នាំ ជនជាតិខ្មែរ មុខរបរកសិករ   រស់នៅភូមិទួលច្រេស ឃុំពពែត ស្រុកស្វាយទាប ខេត្តស្វាយរៀង ជិះម៉ូតូម៉ាកPULSAR  ពណ៌ក្រហម ពាក់ស្លាកលេខ ភ្នំពេញ១CJ-០០៥៩រងខូចខាតយ៉ាងដំណំ។

ចំណែកអ្នកបើកត្រាក់ទ័រសណ្តោងរ៉ឺម៉កត្រូវបានគេស្គាល់ឈ្មោះស្រី វុទ្ធី ភេទប្រុស អាយុ២៦ឆ្នាំ ជនជាតិខ្មែរ មុខរបរកសិករ រស់នៅភូមិបែកចាន ឃុំរមាំងថ្កោល ស្រុកស្វាយទាប ខេត្តស្វាយរៀង។

តាមសាក្សីបានឱ្យដឹងថា មុនកើតហេតុបុរសរងគ្រោះបានជិះម៉ូតូម៉ាកPULSAR  ពណ៌ក្រហម ពាក់ស្លាកលេខ  ភ្នំពេញ១CJ-០០៥៩ដោយធ្វើដំណើរក្នុងទិសដៅពីត្បូងទៅជើងប្រើប្រាស់ល្បឿនលឿនខ្វះការប្រុងប្រយ័ត្នលើផ្លូវលេខ៣១៧B ខណៈនោះស្រាប់តែទៅបុកត្រាក់ទ័រម៉ាក គូបូតា ពណ៌ក្រហម គ្មានស្លាកលេខ ចំពីមុខក្នុងទិសដៅផ្ទុយគ្នាពីជើងទៅត្បូង យ៉ាងពេញទំហឹងបង្កការភ្ញាក់ផ្អើលតែម្ដង។

ចំពោះមធ្យោបាយធ្វើដំណើរទាំងពីរគ្រឿងសមត្ថកិច្ចធ្វើការវាស់វែងអូសយកទៅរក្សាទុកនៅប៉ុស្តិ៍រដ្ឋបាលឃុំពពែត ដើម្បីដោះស្រាយពេលក្រោយតាមច្បាប់៕

ដោយ៖ យឹម សុថាន