ភ្នំពេញ៖ នៅល្ងាចថ្ងៃទី១៣មីនា ឆ្នាំ២០១៦ នេះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានដឹកនាំគណៈប្រតិភូ ត្រឡប់មកពីសាធារណរដ្ឋប្រជាធិបតេយ្យប្រជាមានិតឡាវវិញហើយប្រកបដោយសុខសុវត្ថិភាពបន្ទាប់ពីបានអញ្ជើញទៅបំពេញទស្សនកិច្ចការងារ រយៈពេល២ ថ្ងៃ ពីថ្ងៃទី១២ ដល់១៣ មីនា ឆ្នាំ ២០១៦ ។
ក្នុងដំណើរបំពេញទស្សនកិច្ចការងាររបស់សម្តេចតេជោ ហ៊ុន សែន និងគណៈប្រតិភូជាន់ខ្ពស់របស់ព្រះរាជាណាចក្រកម្ពុជាទៅកាន់ ប្រទេសឡាវ ២ថ្ងៃនេះ គឺពិតជាមានសារសំខាន់ និងទទួលបាន លទ្ឋផលល្អប្រសើរ ដោយក្នុងជំនួបផ្លូវការនោះ ថ្នាក់ដឹកនាំនៃ ប្រទេសទាំង២ បានពិភាក្សាគ្នាលើបញ្ហាជាច្រើន ជាពិសេសផ្តោតលើ ទំនាក់ទំនងនៃប្រទេសទាំង២ កម្ពុជា-ឡាវក្នុងពង្រឹងនិងពង្រីក ទំនាក់ទំនងកិច្ចសហប្រតិបត្តិការ នៃប្រទេសទាំង ពីរ ឲ្យកាន់តែ រឹងមាំរីកចំរើនទ្វេឡើងថែមទៀត ព្រមទាំងជំរុញផ្នែកសេដ្ឋកិច្ច ពាណិជ្ជកម្ម ទេសចរណ៍ វប្បធម៌ និងកីឡា រួមទាំងការ ទំនាក់ទំនងរវាងប្រជាជន និងប្រជាជននៃប្រទេសទាំងពីរ ក្នុងការប្រាស្រ័យទាក់ទងគ្នាឲ្យកាន់តែជិតស្និទ្ធថែមទៀត ពីមួយថ្ងៃទៅមួយថ្ងៃ៕
ដោយ៖ សុវណ្ណារ៉ា
