ភ្នំពេញ ៖ មុខរបរដាំដំឡូងមី គឺជាការងារកសិកម្មចាំបាច់មួយរបស់កសិករនៅស្រុកភ្នំក្រវាញ ខេត្តពោធិ៍សាត់ ក្រៅពីមុខរបរដាំសណ្ដែក ពោត ស្រូវ និងចូលព្រៃកាប់ឈើលក់ ប៉ុន្តែមុខរបរដាំដំឡូងមីរបស់អ្នកស្រុកភ្នំក្រវាញ មួយចំនួន ប្រឈមនឹងការខាតបង់ខ្ពស់ ដោយសារបញ្ហាអាកាសធាតុ និងតម្លៃដំឡូងចុះថោកពេលប្រមូលផល ខណៈពួកគាត់ជាប់បំណុលនៅធនាគារ។
កសិករម្នាក់រស់នៅឃុំផ្ទះរុង ស្រុកភ្នំក្រវាញ គឺស្ដ្រីឈ្មោះ ញាណ សុខរឿន មានប្រសាសន៍ថា ដើម្បីចិញ្ចឹមកូន ១០នាក់នៅក្នុងបន្ទុកតែម្នាក់ឯងដោយប្ដីស្លាប់ចោលនោះ រូបគាត់ត្រូវជួលដីគេ១ហិកតារបន្ថែមលើដីដែលខ្លួនមានស្រាប់ទំហំ២ហិកតា ដើម្បីដាំដំឡូង។ លោកស្រីថា អ្នកចម្ការដូចគាត់មិនរំពឹងអ្វីក្រៅពីដាំដំឡូង ឬសណ្ដែកឡើយ ខណៈគាត់ជំពាក់បំណុលនាយទុនកាន់តែច្រើន។
ស្ដ្រីរូបនេះបន្ដថា កាលពីឆ្នាំមុន គាត់ដាំដំឡូងបាន៧លានរៀល តែឆ្នាំនេះបានតែ៥លានរៀលទេ ដែលធ្វើឱ្យកាត់ត្រូវជំពាក់បំណុលគេយ៉ាងច្រើន និងកំពុងតែប្រឈមនឹងការរឹបអូសដី ព្រោះតែគ្មានលុយសងគេវិញ។
ចំណែកកសិករ ណុប ផាន ឲ្យដឹងថា សព្វថ្ងៃគាត់មានដីចម្ការក្បែរផ្ទះមិនដល់១ហិកតារទេ ទើបក្នុងមួយឆ្នាំៗគាត់ត្រូវចំណាយលុយ ១លានរៀលជួលដីទំហំ ១ហិកតារកន្លះ ដើម្បីដាំដំឡូងបន្ថែម។ លោកថា ដ្បិតឆ្នាំនេះដំឡូងមិនខូចខាតច្រើនដោយគ្រោះធម្មជាតិ ប៉ុន្តែបញ្ហាតម្លៃដំឡូងធ្លាក់ចុះពី ៦៦០រៀលក្នុង ១គីឡូក្រាម មកនៅត្រឹម ៤៤៧រៀលក្នុង ១គីឡូក្រាមនៅដើមឆ្នាំ២០១៦ បានធ្វើឲ្យប៉ះពាល់យ៉ាងខ្លាំងដល់ជីវភាពកសិករ។ លោកថា បើទោះជាដំឡូងមិនឡើងថ្លៃ ក៏ឆ្នាំក្រោយលោកនៅតែដាំដែរ ព្រោះគ្មានរបរអ្វីពីនេះទេ។ ហេតុនេះ លោកមានតែអំពាវនាវឱ្យអ្នកពាក់ព័ន្ធ មេត្តាជួយជម្រុញឈ្មួញ ឱ្យផ្ដល់តម្លៃសមរម្យដល់ពួកគាត់ផង។
ទាក់ទងបញ្ហានេះ ប្រធានមន្ទីរកសិកម្មខេត្តពោធិ៍សាត់ លោក ឡាយ ពិសិដ្ឋ ថ្លែងថា ផ្ទៃដីកសិកម្មរួមក្នុងខេត្តមាន ១២ម៉ឺនហិកតារ ក្នុងនោះផ្ទៃដីដាំដំឡូងរបស់កសិករមានជាង ២ម៉ឺនហិកតារ និងដីដាំដំឡូងក្រុមហ៊ុនមានជាង ២ម៉ឺនដែរ។ លោកថា បច្ចុប្បន្នតម្លៃដំឡូងបានឡើងដល់ ៥៣០រៀលវិញហើយក្នុង ១គីឡូក្រាម ក្រោយពីលោក និងអភិបាលរងខេត្តម្នាក់ ហៅតំណាងកសិករប្រជុំ។ លោកថា កន្លងមកលោកបានប្រាប់ឱ្យប្រជាពលរដ្ឋផ្អាកលក់ ពេលដែលដំឡូងចុះថោក ចាំទាល់តែឡើងថ្លៃវិញចាំលក់។
លោក ឡាយ ពិសិដ្ឋ ថាមន្ទីរមិនបានស្រង់ចំនួនកសិករខ្វះខាតដីធ្វើកសិកម្មនោះទេ ប៉ុន្តែតាមរយៈគោលនយោបាយចាស់សកម្មភាពថ្មីរបស់រដ្ឋាភិបាល ប្រជាកសិករទទួលបានដីកសិកម្មច្រើនហើយ៕ វិបុល
