ខេត្តស្វាយរៀង៖ លោកតាអាយុ៧៧ឆ្នាំម្នាក់បានរងរបួសដោយសារករណីគ្រោះថ្នាក់ចរាចរណ៏ដោយត្រូវរថយន្តម៉ាកស្តារិចបើកបុកម៉ូតូពីក្រោយយ៉ាងពេញទំហឹងហើយបន្តបើកគេចដល់ពាក់កណ្ដាលផ្លូវត្រូវសមត្ថកិច្ចរាយការណ៍តាមវិទ្យុទាក់ទងស្ទាក់ចាប់បានក្នុងឃុំពងទឹកស្រុករំដួល។

ហេតុការណ៍នេះបានកើតឡើងកាលពីវេលាម៉ោង១០ព្រឹក ថ្ងៃទី១៣ខែមិថុនាឆ្នាំ២០២១ ស្ថិតឡើងលើផ្លូវជាតិលេខ ១៣នៅត្រង់ចំណុចភូមិត្រពាំងដំរី ឃុំកំពង់អំពិល ស្រុករំដួលខេត្តស្វាយរៀង។

សមត្ថកិច្ចនគរបាលស្រុកបានឲ្យដឹងថាលោកតារងគ្រោះមានឈ្មោះអ៊ុក រ៉ែម អាយុ ៧៧ឆ្នាំ មុខរបរកសិកររស់នៅភូមិថ្នា ឃុំថ្នាធ្នង់ ស្រុករំដួលខេត្តស្វាយរៀង ខណះបើកម៉ូតូម៉ាកហុងដាគុប៧០មូល ពណ៌សំបកឪឡឹកគ្មានស្លាកលេខខូចខាតទាំងស្រុង។

ចំណែកអ្នកបើករថយន្តបង្កហេតុមានតឈ្មោះ វង រ៉ាយ៉ា  អាយុ ២៩ ឆ្នាំ មុខរបរ បើកបររស់នៅភូមិព្រៃស្ទៀង ឃុំស្វាយតាយាន ស្រុក កំពង់រោទិ៍ ខេត្ត ស្វាយរៀង។

តាមសាក្សីបានអោយដឹងថាមុនកើតហេតុមានបុរសចំណាស់ម្នាក់បានជិះម៉ូតូមួយគ្រឿងម៉ាកហុងដាគុប៧០មូល ពណ៌សំបកឪឡឹកគ្មានស្លាកលេខ
ក្នុងទិសដៅ ពីជើងទៅត្បូងខណ:នោះស្រាប់តែមានរថយន្តម៉ាកស្តារិច ពណ៌ស ពាក់ស្លាកលេខភ្នំពេញ២BE៩០៥៥ប្រើប្រាស់ល្បឿនលឿនក្នុងទិសដៅស្របគ្នាបានបុកម៉ូតូពីក្រោយយ៉ាងពេញទំហឹងបង្កការភ្ញាក់ផ្អើល។

ក្រោយពីឃើញសភាពការណ៍មិនស្រួលក៏បន្តបើកគេចដល់ពាក់កណ្ដាលផ្លូវត្រូវសមត្ថកិច្ចរាយការណ៍តាមវិទ្យុទាក់ទងស្ទាក់ចាប់បាននៅក្នុងឃុំពងទឹកស្រុករំដួលផងដែរ។

លោកតារងគ្រោះត្រូវបានសមត្ថកិច្ចបញ្ជូនទៅសម្រាកព្យាបាលនៅមន្ទីពេទ្យខេត្តស្វាយរៀងចំណែកម៉ូតូអូសយកមករក្សានៅប៉ុស្តិ៍រដ្ឋបាលកំពង់អំពិលដោយឡែក រថយន្តយកមករក្សាទុកនៅអធិការដ្ឋាននគរបាលស្រុករំដួលដើម្បីដោះស្រាយពេលក្រោយតាមច្បាប់៕

ដោយ៖ យឹម  សុថាន