ភ្នំពេញ៖ លោក ប៉ា សុជាតិវង្ស អភិបាលរាជធានីភ្នំពេញ បានបញ្ជាក់ថា៖ អាជ្ញាធររាជធានីភ្នំពេញ និងមានវិធានការ យ៉ាងតឹងរឹង ចំពោះរថយន្តធុនធ្ងន់ ចេញចូលរាជធានីភ្នំពេញ ដោយបានដាក់ចេញនូវគោលការណ៍ចំនួន៣ ចំណុច គឺកំណត់តម្រាយផ្លូវរត់ កំណត់ប្រភេទរថយន្ត និងកំណត់រយៈពេល វេលានៃការធ្វើ ដំណើរ ឲ្យបានច្បាស់លាស់ ចាប់ពីថ្ងៃទី២០ មីនានេះតទៅ ។
ដោយសារបច្ចុប្បន្នអាជ្ញាធរយើង មានការយោគយល់ច្រើនចំពោះរថយន្ដធុនធំ ចូលក្រុង តែពួកគេមិនបានគោរព តាម ការណែនាំរបស់អាជ្ញាធរយើងនោះទេ កន្លងមកនេះ ដូច្នេះ អាជ្ញាធរ ចាប់ពីពេលនេះ មិនអាចលើកលែងតទៅទៀតនោះឡើយ ។
លោក ប៉ា សុជាតិវង្ស បានបញ្ជាក់បែបនេះ នៅក្នុង កិច្ចប្រជុំ ជាមួយគណៈបញ្ជាការ ឯកភាព រាជធានីភ្នំពេញ កាលពីរសៀលថ្ងៃទី ១៥ មីនា ឆ្នាំ២០១៦នេះថា៖ កន្លងមកអាជ្ញាធរ រាជធានីភ្នំពេញ បានធ្វើការរឹតបន្តឹង និងបានហាមឃាត់រថយន្តធុនធ្ងន់ ចេញចូលរាជធានី ភ្នំពេញ ដោយតម្រូវឲ្យពួកគេត្រូវមក ធ្វើប័ណ្ណប្រភេទ A, B ,C ក្នុងបណ្ណ័នោះមានដាក់ពេលវេលាច្បាស់លាស់ចាប់ពិ ម៉ោង៦៖០០នាទី ព្រឹកដល់ម៉ោង៩៖០០នាទីព្រឹក និងម៉ោង១៦៖០០នាទី រសៀលដល់ ម៉ោង ២០, ០០នាទីយប់។ ចំពោះប័ណ្ណប្រភេទ D ហាម ឃាត់ចេញចូលរាជធានីពីម៉ោង ៦៖០០នាទីព្រឹក ដល់ម៉ោង២០,០០នាទីយប់ ប៉ុន្តែអនុញ្ញាតិ ឲ្យចរាចរ២៤ម៉ោង លើ២៤ម៉ោងលើតម្រាយផ្លូវក្រវ៉ាត់ក្រុងបានរួមមាន៖ ផ្លូវជាតិលេខ៦ ផ្លូវលោកឧកញ៉ា លី យ៉ុងផាត់ ស្ពានព្រែកព្នៅ ផ្លូវកប់ស្រូវ កំណាត់ផ្លូវជាតិលេខ៤ ផ្លូវវេងស្រេង ផ្លូវជើងឯក ស្ពានព្រែកសំរោង ផ្លូវថៃហ្គ័រ និងផ្លូវជាតិលេខ១។
លោក ប៉ា សុជាតិវង្ស បានបញ្ជាក់បន្ថែមថា ៖ លក្ខណៈសម្បត្តិដែលរថយន្ត ទទួលបានប័ណ្ណ ចេញចូលរាជធានីភ្នំពេញ ត្រូវមានប័ណ្ណសម្គាល់យានយន្ត ប័ណ្ណបើកបរ ឈៀក លិខិតធ្វើអា ជីវកម្ម និងពន្ឋផ្លូវប្រចាំឆ្នាំ ។
សូមបញ្ជាក់ថា៖ ប្រជាពលរដ្ឋមួយចំនួនបានរិះគុណ ដល់លោកប៉ា សុជាតិវង្ស ចៅហ្វាយ ក្រុង និយាយឲ្យរួចតែពីមាត់ ពេលដឹងថា អាជ្ញា ធរ រាជធានីភ្នំពេញ បានចាត់វិធានការយ៉ាងតឹងរឹង ចំពោះរថយន្ដធុនធំចូលក្រុង ដោយកន្លង មក បានចាត់វិការដូចគ្នានេះជាច្រើនដងមកហើយ ឃើញថា គ្មានប្រសិទ្ធភាពអ្វីទាល់តែ សោះ ៕
ដោយ៖ សំរិត
