ខេត្តរតនគិរី៖ រាជរដ្ឋាភិបាលកំពុងផ្តោតការយកចិត្តទុកដាក់ ជាពិសេសលើវិស័យអប់រំ ចាប់ពីមត្តេយ្យសាលា រហូតដល់ឧត្តមសិក្សា ដោយបានកសាងសាលាគ្រប់ទិសទី ក្នុងទីក្រុង ក៏ដូចជាតាមជនបទ ។
ប៉ុន្តែមន្ទីរអប់រំយុវជន និងកីឡាខេត្តរតនគិរី ហាក់បីដូចជានៅមានកំរិត លើការគ្រប់គ្រងតាមបណ្តាការិយាល័យអប់រំ ក្នុងស្រុកនីមួយៗនៅខេត្តរតនគិរី ។
ជាក់ស្តែងសាលាបឋមសិក្សាហ៊ុន សែនភូមិថ្មី ស្ថិតនៅភូមិថ្មី សង្កាត់ឡាបានសៀក ក្រុងបានលុង ខេត្តរតនគិរី ដែលមានចំនួនសិស្សសរុប១.៣៤៨នាក់ មានអាគារចំនួន៤ខ្នង ស្មើ២០បន្ទប់ ក្នុងអំឡុងរដូវប្រាំងនេះ សិស្សានុសិស្សតូចៗ ត្រូវប្រឈមនឹងការខ្វះទឹកប្រើ នៅពេលចូលបង្គន់អនាម័យម្តងៗ ដោយសាលាមានបង្គន់ចំនួន០៣ ស្មើ១២បន្ទប់ បច្ចុប្បន្ននេះ គេសង្កេតឃើញនៅតាមបង្គន់នីមួយៗ ត្រូវបានចាក់សោរចោល ។
រីឯបន្ទប់បង្គន់ខ្លះ ខ្វះអនាម័យលាមក ឫសំរាមនៅពេញបង្គន់ ជាការធ្វើអោយកុមារតូចមិនអាចចូលបន្តោបង់កើតនោះទេ ព្រោះថា សិស្សខ្លះ ខ្លាចមិនហ៊ានសុំសោពីអ្នកយាមបង្គន់ ហើយសិស្សខ្លះទៀតថា ពិបាកទ្រាំនឹងក្លិនក្នុងបង្គន់ផងដែរ ។
អ្នកគ្រូ សេន ចាន់រ័ត្ន ជាអ្នកមើលថែបង្គន់បានបញ្ជាក់ថា ចំពោះការចាក់សោរបង្គន់ មិនមែនមិនអោយក្មេងចូលបត់ជើងនោះទេ គ្រាន់តែទុកសោអោយមកយកពីគាត់ដើម្បីងាយស្រួលណែនាំក្មេងទៅបត់ជើងរួចអោយចេះចាក់ទឹក និងជួយអនាម័យផង ។
អ្នកគ្រូបានប្រាប់ទៀតថា រាល់ថ្ងៃសាលាពុំមានទឹកប្រើប្រាស់នោះទេ ព្រោះអណ្តូងស្នប់ខូច និងអណ្តូងជីកមានទឹកតិចតួច ហើយម៉ូទ័រខូចខ្វះថវិកាជួសជុល ។
កុមារមកចូលបង្គន់នេះ គឺប្រើទឹកស្អាតរបស់អ្នកគ្រូផ្ទាល់ ហើយបញ្ហាខ្វះទឹកចំនួន២-៣ខែហើយ រឿងនេះសួរទៅនាយកសាលាវិញទៅ ។
ចំណែកលោកគ្រូប៉ត ធួន នាយកសាលា បានអោយដឹងថា សាលាពេលនេះ ពិតជាខ្វះទឹកមែន ព្រោះថា អណ្តូងទាំងពីរខូចហើយ គ្មានលុយធ្វើរាល់ថ្ងៃ ប្រើតែអណ្តូងដៃតែប៉ុណ្ណោះ ហើយមានទឹកតិចតួចទៀតផង មិនអាចប្រើគ្រប់គ្រាន់បាននោះទេ ។
លោកថា បញ្ហានេះលោកបានលើកនៅក្នុងអង្គប្រជុំដែរ តែមិនទាន់មានការឆ្លើយតបពីប្រធានមន្ទីរនៅឡើយ ។ ដូច្នេះការជួសជុលម៉ូទ័រ និងអណ្តូងស្នប់ សាលាគ្មានលុយទេ ដោយបច្ចុប្បន្ននេះ សាលាទទួលបានថវិកាពី B-P មានការយឺតយ៉ាវពេក ទើបការដោះស្រាយបញ្ហាទឹកផ្គត់ផ្គង់សាលា មានការលំបាកយ៉ាងខ្លាំង ហើយបញ្ហាសំរាមមួយវិញទៀត ក្រុមហ៊ុនគឹម ជ្រា ប្រមូលសំរាមក្រុងបានលុង គេទារតម្លៃ៨ម៉ឺនរៀលក្នុង១ខែ ហើយលោកគ្រូ អ្នកគ្រួ ព្រមទាំងសិស្សានុសិស្ស ប្រមូលដុតចោលក្នុងបរិវេណសាលា ហើយមួយត្រីមាស សាលាទទួលបានប្រាក់ B-P ៣លាន់រៀលដែរ ។
ទាក់ទងនឹងបញ្ហាកង្វះទឹកនេះ លោកស្រី ចាន់ ខាំឃឿ ប្រធានមន្ទីរអប់រំយុវជន និងកីឡាខេត្តរតនគិរី បានមានប្រសាសន៍ថា នេះគឺនាយកសាលាខ្វះសមត្ថភាពក្នុងការគ្រប់គ្រងទៅលើក្រុមប្រឹក្សាកុមារ មិនដាក់ផែនការអោយបានត្រឹមត្រូវក្នុងការពន្យល់ណែនាំដល់កុមារតូចៗទាំងនោះ ។
ចំពោះថវិកាវិញ តាមសាលានីមួយៗ អាចដកបាននៅពេលល្ងាចនេះ លោកស្រី នឹងចុះទៅពិនិត្យមើលដោយផ្ទាល់នៅពេលឆាប់ៗនេះ ៕
ដោយ៖ វុទ្ធឦសាន
