ខេត្តបាត់ដំបង៖ សមត្ថកិច្ចឃាត់ខ្លួនជនសង្ស័យម្នាក់ជាមុខសញ្ញាដែលចូលលួចទ្រព្យសម្បត្តិរបស់ប្រជាពលរដ្ឋនៅក្នុងមូលដ្ឋាន។

លោកវរសេនីយ៍ឯក សេង លុច អធិការនគរបាលស្រុកថ្មគោលបានបញ្ជាក់ឲ្យដឹងថា÷ ក្រោយជនសង្ស័យធ្វើសកម្មភាពលួចទ្រព្យសម្បត្តិរបស់ប្រជាពលរដ្ឋបានប្រមាណជាង ៥ម៉ោង នៅព្រឹកថ្ងៃទី ២៤ ខែមិថុនា ឆ្នាំ ២០២១ នេះកម្លាំងផ្នែកជំនាញស្រុកថ្មគោលបានចុះស្រាវជ្រាវ រហូតកំណត់មុខសញ្ញាឈានដល់ការឃាត់ខ្លួនជនសង្ស័យបានរួមទាំងវត្ថុតាងទ្រព្យសម្បត្តិមួយចំនួនផងដែលជនរងគ្រោះបាត់កាលពីវេលាទៀបភ្លឺថ្ងៃដដែល។

ជនសង្ស័យដែលឃាត់ខ្លួនបានឈ្មោះលួន ចាន់ធី ភេទប្រុស អាយុម១៨ឆ្នាំ រស់នៅក្នុងភូមិបោះពោធិ៍ ឃុំអូរដំបង១ ស្រុកសង្កែ ចំណែកឯជនរងគ្រោះឈ្មោះហឿន រឿន ភេទប្រុស អាយុ ៦១ឆ្នាំ មានទីលំនៅភូមិជ្រៃ ឃុំជ្រៃ ស្រុកថ្មគោល ខេត្តបាត់ដំបង នៅថ្ងៃកើតហេតុត្រូវជនសង្ស័យខាងលើចូលលួចយកនូវទ្រព្យសម្បត្តិអស់ជាច្រើន។

ក្នុងការបង្ក្រាបផ្នែកជំនាញដកហូតបាន អំភ្លីម៉ិចស័រចំនួន ០១គ្រឿង ទូស័ព្ទដៃចំនួន ៣គ្រឿង ស៊ីមកាតមួយចំនួនទៀតជារបស់ជនរងគ្រោះដែលបានបាត់។ បច្ចុប្បន្ននេះនគរបាលជំនាញកំពុងរៀបចំសំណុំរឿងបញ្ជូនទាំងជនសង្ស័យ និងវត្ថុតាងមកកាន់ការិយាល័យជំនាញស្នងការខេត្តដើម្បីអនុវត្តបន្តតាមនីតិវិធី៕

ដោយ៖ ចន្ទ លីហ្សា