ភ្នំពេញ៖ មានអំពើបាញ់ប្លន់យកម៉ូតូពីជនរងគ្រោះមិនបានសម្រេចមួយបានកើតឡើងបណ្តាលអោយយុវជនម្នាក់បានរងរបួសត្រូវផ្លៅហើយត្រូវបានគេជួយដឹកមកព្យាបាលនៅមន្ទីរពេទ្យគឹមសុងភ្លាមៗ។

ករណីនេះបានកើតឡើងនៅវេលាម៉ោង៥ទៀបភ្លឺថ្ងៃទី១៧ ខែមីនា ឆ្នាំ២០០១៦ ស្ថិតនៅមុខចំការព្រីង សង្កាត់ភ្នំពេញថ្មី ខណ្ឌសែនសុខ។

ជនរងគ្រោះមានឈ្មោះ អុប វលក្ខ័ អាយុ២៣ ឆ្នាំ មុខរបរជាងដែក ស្នាក់នៅភូមិច្រេស សង្កាត់ភ្នំពេញថ្មី ខណ្ឌសែនសុខ និងមានស្រុកកំណើតនៅខេត្បូងឃ្មុំ។

ប្រភពពីជនរងគ្រោះបានអោយដឹងថា នៅមុនពេលកើតហេតុជនរងគ្រោះបាននាំមិត្តភក្តិចូលរាំកំសាន្តនៅក្លិបប្លូសូន្យផ្លូវ១៩៨៦ សង្កាត់ភ្នំពេញថ្មី ខណ្ឌសែនសុខ។ លុះដល់ម៉ោងប្រហែលម៉ោង៤ជាងក៏ចេញពីក្លឹបត្រឡប់ទៅផ្ទះវិញដោយជិះម៉ូតូ១គ្រឿងម៉ាកហុងដាឌ្រីម សេ១២៥ ស៊េរីឆ្នាំ២០១៥ ពណ៍ខ្មៅពាក់ស្លាកលេខកំពង់ចាម 1G-7563 លុះមកដល់ចំណុចកើតហេតុមុខចំការព្រីងសង្កាត់ភ្នំពេញថ្មី ស្រាប់តែធ្លាយកង់ម៉ូតូហើយជនរងគ្រោះក៏បានឈប់អង្គុយលើម៉ូតូរបស់ខ្លួន ក៏លេចមុខជនសង្ស័យ៣នាក់ជិះម៉ូតូ២គ្រឿងម៉ាកហុងដាសេ១២៥មិនចាំស្លាកលេខ និង១គ្រឿងទៀតម៉ាកវ៉េវអាល់ហ្វាមិនចាំស្លាកលេខដូចគ្នាប្រដាប់ដោយអាវុធខ្លីមួយដើមម៉ាក K54 បានដកកាំភ្លើងភ្ជង់ប្លន់ជនរងគ្រោះហើយបាញ់ឡើងលើ១គ្រាប់ និងបាញ់មួយគ្រាប់ទៀតសំដៅមកលើជនរងគ្រោះបណ្តាលអោយត្រូវភ្លៅខាងឆ្វេងរងរបួសធ្ងន់ហើយជនសង្ស័យបម្រុងនិងជិះម៉ូតូជនរងគ្រោះតែដោយសារម៉ូតូជនរងគ្រោះធ្លាយកង់ខាងក្រោយមិនអាចជិះទៅណាបានទើបពួកវាជិះម៉ូតូរត់គេចខ្លួនបាត់ស្រមោលដោយសុវត្ថភាព។

ក្រោយកើតហេតុជនរងគ្រោះត្រូវបានគេដឹងបញ្ជូនមកកាន់មន្ទីរពេទ្យឯកជនដើម្បីសង្គ្រោះ៕

ដោយ៖ តុង សីហា