ភ្នំពេញ៖ នៅថ្ងៃទី១៧ ខែកក្កដា ឆ្នាំ២០២១ សម្តេចតេជោ ហ៊ុន សែន ប្រកាសជួយឧបត្ថម្ភម៉ាស់ធម្មតាចំនួន១លាន និងម៉ាស់ N95 ១សែន ម៉ាស៊ីនផលិតអុកស៊ីសែន១០០គ្រឿង និងថវិកាចំនួន២០ម៉ឺនដុល្លារ ជូនដល់ប្រទេសវៀតណាម ដើម្បីចូលរួមទប់ស្កាត់ការរីករាលដាលជំងឺកូវីដ១៩ ដែលកំពុងវាយលុកយ៉ាងខ្លាំងនៅក្នុងប្រទេសនេះ។
ដោយឡែក សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានសម្រេចជួយឧបត្ថម្ភថវិកាចំនួន ១០ម៉ឺនដុល្លារ ជូនដល់កាកបាទក្រហមវៀតណាម តាមរយៈស្ថានទូតវៀតណាមប្រចាំនៅកម្ពុជា ក្នុងការចូលរួមដល់យុទ្ធនាការទប់ស្កាត់ការរីករាលដាលជំងឺកូវីដ-១៩ នៅប្រទេសវៀតណាម។ សូមបញ្ជាក់ថា បើយោងតាមរាយការណ៍ប្រចាំថ្ងៃ ស្ដីពីករណីអ្នកកើតកូវីដ-១៩ ប្រទេសវៀតណាម នៅព្រឹកថ្ងៃសៅរ៍ទី១៧ ខែកក្កដា ឆ្នាំ២០២១នេះ បានប្រកាសថា រកឃើញអ្នកជំងឺកូវីដ-១៩ថ្មីចំនួន២.១០៥នាក់ទៀត។ ដែលករណីនាំឱ្យចំនួនអ្នកឆ្លងថ្មីនេះ នៃប្រទេសមួយនេះ កេីនឡើងដល់៤២.៦៦៣នាក់ហហេីយ។
ដោយឡែកនៅកម្ពុជា បន្តរកឃើញករណីឆ្លងកូវីដ-១៩ថ្មី ចំនួន ៨៣៦នាក់ និងអ្នកជាសះស្បើយ ៩២៨នាក់ ខណៈអ្នកជំងឺកូវីដស្លាប់ ២៤នាក់ នៅថ្ងៃនេះ ៕ដោយ៖សុខ ខេមរា
