មហាសេដ្ឋីអាម៉ាហ្សូន លោក Jeff Bezos នៅថ្ងៃទី២០ ខែកក្កដា បានឡើងទៅកាន់លំហអាកាសផែនដី ក្លាយទៅជាមហាសេដ្ឋីទីពីរហើយនៅលើពិភពលោក ដែលបានធ្វើដំណើរទៅទីអវកាសដោយប្រើយានផ្ទាល់ខ្លួន។

សារព័ត៌មាន AP បានផ្សាយថា លោក Jeff Bezos ធ្វើដំណើរទៅកាន់ទីអវកាសជាមួយសមាជិកដែលបានជ្រើសរើស ក្នុងនោះមាន បងប្រុសរបស់លោកឈ្មោះ Mark Bezos និស្សិតអាយុ១៨ឆ្នាំជនជាតិហុល្លង់ Oliver Daemen និងលោក Wally Funkអាយុ៨២ឆ្នាំរស់នៅរដ្ឋតិចសាស់ ។ អ្នកឡើងទៅពេលនេះមានមនុស្សវ័យក្មេងបំផុតនិងចាស់បំផុត។ និស្សិតវ័យ១៨ឆ្នំាជាអតិថិជនដំបូង ដែលបានបង់លុយទៅឲ្យក្រុមហ៊ុនដើម្បីឡើងទៅកាន់ទីអវកាស។
ក្រោយរយៈពេលធ្វើដំណើរ១០នាទីហើយចុះចតដល់ផែនដីវិញ មហាសេដ្ឋី Jeff Bezos បានលើកឡើងថា «ជាពេលវេលាអស្ចារ្យបំផុតមិនធ្លាប់មានពីមុនមក»។
គូប្រជែងរបស់មហាសេដ្ឋីអាម៉ាហ្សូន គឺមហាសេដ្ឋី Richard Branson របស់ក្រុមហ៊ុន Virgin Galactic បានទៅកាន់ទីអវកាសដោយជោគជ័យមុនមហាសេដ្ឋីអាម៉ាហ្សូន ៩ថ្ងៃ។ លោក Jeff Bezos បញ្ជាក់ថា នេះមិនមែនជាការប្រកួតប្រជែងនោះឡើយ គឺជាការកសាងផ្លូវឡើងទៅកាន់ទីអវកាសដើម្បីអ្នកជំនាន់ក្រោយធ្វើបានល្អជាងនេះ។
យានអវកាស Blue Origin បានឡើងកម្ពស់ពីផែនដី ១០៦ គីឡូម៉ែត្រ គឺខ្ពស់ជាងដំណើរទៅទីអវកាសរបស់លោក Branson កាលពីថ្ងៃទី១១ខែកក្កដា ។ រ៉ុក្កែតរុញកម្ពស់១៨ម៉ែត្របានបញ្ជូនយានអវកាសក្នុងល្បឿនលឿនជាងសំឡេង៣ដង ហើយក៏ផ្តាច់ខ្លួនចេញពីយានចុះចតនៅផែនដីដោយជោគជ័យ៕ដោយ៖ធីរីណា

រូបថត៖AP.