ខេត្តបន្ទាយមានជ័យ÷ថ្លើមធំមែនហ៊ានលួចគោអ្នកស្រុកដឹកតាមរថយន្តមិនខ្លាចគុកច្រវាក់ តែទីបំផុតកម្លាំងនគរបាលស្រុកស្វាយចេកឃាត់ខ្លួននៅយប់ថ្ងៃទី២៦ ខែកក្កដា ឆ្នាំ២០២១ នៅលើកំណាត់ផ្លូវជាតិលេខ៥៦A ចំណុចមុខវិទ្យាល័យកកោះ ស្ថិតក្នុងភូមិកកោះ ឃុំស្លក្រាម ស្រុកស្វាយចេក ខេត្តបន្ទាយមានជ័យ។
តាមការឲ្យដឹងពីលោកវរសេនីយ៍ឯក ជា ស្លូញ អធិការនគរបាលស្រុកស្វាយចេក បានបប្រាប់ថា នៅយប់ថ្ងៃទី២៥ ខែកក្កដា ឆ្នាំ២០២១ ក្រោយពីទទួលព័ត៌មានពី ប្រជាពលរដ្ឋ ឈ្មោះ វ៉ាត់ ផុន ភេទប្រុស អាយុ៥៣ឆ្នាំ នៅភូមិប្រាសាទ ឃុំស្លក្រាម ស្រុកស្វាយចេក ខេត្តបន្ទាយមានជ័យថា មានចោរចូលលួចសត្វគោញីរបស់គាត់ចំនួន០៣ក្បាល ដែលចងទុកនៅនឹងផ្ទះ ដឹកតាមរថយន្តពណ៌ខៀវ ពាក់ស្លាកលេខ កំពត ២A ០៥៩៥ ។
បន្ទាប់ពីទទួលដំណឹងនេះភ្លាមលោកបានចាត់កម្លាំងចុះប្រតិបត្តិការត្រួតពិនិត្យ គ្រប់ផ្លូវចេញចូលទៅភូមិប្រាសាទ ។ លុះនៅវេលារំលងអធ្រាត្រ ឈានចូលថ្ងៃទី២៦ ខែកក្កដា ឆ្នាំ២០២១ សមត្ថកិច្ចឃើញរថយន្តដូចមានភិនភាគ ម្ចាស់គោបានរាយការណ៍កំពុងបើកបរនៅលើផ្លូវជាតិលេខ៥៦A ទើបកម្លាំងនគរនគរបឃាត់ត្រួតពិនិត្យ ឃើញមានដឹកសត្វគោញីចំនួន០៣ក្បាលមែន ។
លោកអធិការបានបញ្ជាក់ថា កម្លាំងបានឃាត់ខ្លួនអ្នកបើកបររថយន្ត ឈ្មោះ សោន ម៉ាញ ភេទប្រុស អាយុ ៤៥ឆ្នាំ នៅភូមិស្នោ ឃុំត្រពាំងស្នោ ស្រុកព្រះវិហារ ខេត្តព្រះវិហារ យកមកអធិការដ្ឋាននគរបាលស្រុកស្វាយចេក ដើម្បីសួរនាំនិងចាត់ការតាមនិតិវិធីច្បាប់ ។ ចំណែកសត្វគោទាំង៣ក្បាល សមត្ថកិច្ចលោកបានប្រគល់ជូនម្ចាស់ដើមវិញហើយ ៕
ដោយ÷ប្រាថ្នា
