ភ្នំពេញ៖ ក្រុមអ្នកជិះម៉ូតូដើរទាក់សត្វឆ្កែជាច្រើននាក់ បាធ្វើសកម្មភាពទាក់សត្វឆ្កែរបស់ប្រជាពលរដ្ឋនៅពេលយប់ ដោយបានសត្វឆ្កែចំនួន ៥ក្បាល រួចបានរត់គេចខ្លួន តែត្រូវសមត្ថកិច្ចខណ្ឌជ្រោយចង្វា ដេញចាប់បានជនសង្ស័យ ២នាក់ ចំណែកបក្ខពួកផ្សេងទៀត បានរត់រួចខ្លួនបាត់ ហេតុដេញឃាត់ក្រុមទាក់សត្វឆ្កែនេះធ្វើឡើងជាយប់ថ្ងៃទី២៦ ខែកក្កដា ឆ្នាំ២០២១ នៅម្តុំបាក់ខែង សង្កាត់បាក់ខែងខណ្ឌជ្រោយចង្វា។
ប្រភពពងត៍មានពីសមត្ថកិច្ចនគរបាលខណ្ឌជ្រោយចង្វាបានឱ្យដឹងថា ជនសង្ស័យទាំង ២នាក់នោះ បច្ចុប្បន្នស្នាក់នៅខណ្ឌដង្កោ រាជធានីភ្នំពេញ ប៉ុន្តែមិនបានបញ្ជាក់ឱ្យដឹងឈ្មោះនោះទេ។
នៅមុនពេលចាប់ខ្លួន កម្លាំងសមត្ថកិច្ច បានល្បាតតាមមូលដ្ឋាន និងពួនស្ទាក់រាល់បទល្មើសនានា។ បន្ទាប់មក ក៏បានឃើញជនសង្ស័យជាច្រើននាក់ កំពុងជិះម៉ូតូជាច្រើនគ្រឿង បានធ្វើសកម្មភាពទាក់សត្វឆ្កែ បានចំនួន ៥ក្បាល រួចច្រកចូលក្នុងបាវបម្រុងជិះរត់គេចខ្លួន។ នៅពេលនោះ ដោយកម្លាំងសមត្ថកិច្ចឃើញទាន់ ក៏បានដេញតាមពីក្រោយ ពីសង្កាត់បាក់ខែង ដល់សង្កាត់ព្រែកលៀប ត្រូវសមត្តកិច្ចចាប់ខ្លួនបានជនសង្ស័យ ២នាក់ និងម៉ូតូ ១គ្រឿង រួមទាំងសត្វឆ្កែនៅក្នុងបាវចំនួន ៥ក្បាល និងប្រដាប់ទាក់មួយចំនួន ផងដែរ។ ចំណែកឯបក្ខពួជនសង្ស័យជាច្រើននាក់ទៀត បានរត់គេចខ្លួនបាត់បាត់។
បន្ទាប់ពីកើតហេតុសមត្ថកិច្ចបាននាំខ្លួនជនសង្ស័យទាំង ២នាក់ និងវត្ថុតាង បញ្ជូនទៅអធិការដ្ឋានជ្រោយចង្វាដើម្បីសួរនាំ និងចាត់ការបន្តតាមនីតិវិធី៕
ដោយ៖ ជ្រោយពេជ្រ
