ភ្នំពេញ៖ ក្រុមគណៈប្រតិភូសាលារាជធានីភ្នំពេញ ដែលដឹកនាំដោយ លោក ប៉ា សុជាតិវង្សអភិបាលរាជធានីភ្នំពេញ បានធ្វើដំណើរទស្សនៈកិច្ចជាផ្លូវការទូត ទៅកាន់ប្រទេសជប៉ុន រយៈពេល៦ថ្ងៃ ចាប់ពីថ្ងៃទី២៤ ដល់ថ្ងៃទី៣០ មីនា ទៅតាមការអញ្ជើញរបស់ អភិបាលក្រុងតូក្យូ និងអភិបាលក្រុង កាន់ទីហ៊្សូ ប្រទេសជប៉ុន ក្នុងគោលបំណងជួបពិភាក្សាការងារផ្លាស់ប្តូរបទពិសោធន៏ និងសិក្សាស្វែងយល់អំពីបញ្ហាចរាចរ ការដឹកជញ្ជូន និងការគ្រប់គ្រងសន្តិសុខសណ្តាប់ធ្នាប់សង្គម។ នេះជាការលើកឡើងរបស់លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានប្រាប់ក្រុមអ្នកសារព័ត៌មានឲ្យដឹងនៅអាកាសយាដ្ឋានអន្ដរជាតិភ្នំពេញកាលពីព្រឹកថ្ងៃទី២៤ មីនានេះ មុននិងគណៈ ប្រតិភូចាកចេញ ។
លោកឡុង ឌីម៉ង់ បានបន្តថា៖ ក្រៅពីការងារខាងលើនេះ លោកអភិបាលបន្តជួបសម្តែងការគួរសមពិភាក្សាការងារមួយចំនួនទៀត ដើម្បីជំរុញកិច្ចសហប្រតិបត្តិការ ក៏ដូចជាថ្លែង អំណរគុណចំពោះរដ្ឋាភិបាលជប៉ុនតាមរយៈអង្គការ ចៃការផងដែរ។ បន្តាប់ពីទីក្រុងតូក្យូ គណៈប្រតិភូ នឹងបន្តដំណើរទស្សនៈកិច្ចជាផ្លូវការមួយទៀតគឺទៅកាន់ទីក្រុងកាន់ទីហ៊្សូនៅពេល នោះទីក្រុងភ្នំពេញ និងទីក្រុងកាន់ទីហ៊្សូ នឹងធ្វើការចុះហត្ថលេខាចងសម្ព័ន្ធមេត្រីភាពជាមួយគ្នា ដើម្បីផ្សារភ្ជាប់កិច្ចទំនាក់ទំនងសម្រាប់ផ្លាស់ប្តូរបទពិសោធន៏គ្នាទៅវិញទៅមករវាងទីក្រុងទាំងពីរ ព្រោះទីក្រុង១នេះ ភ្លាប់បានជួយរាជធានីភ្នំពេញច្រើន ដែលមានប្រជាពលរដ្ឋ និងស្ថានភាពរស់នៅប្រហាក់ប្រហែលគ្នា។
លោក ឡុងឌីម៉ង់ បញ្ជាក់ថា ក្នុងដំណើរទស្សនៈកិច្ចនេះ លោកអភិបាល នឹងចូលជួបសំដែងការគួរសម និងពិក្សារការងារជាមួយ ឯកឧត្តមMasakazu HAMACHI អនុរដ្ឋមន្ត្រីក្រសួងការបរទេសជប៉ុន និងភ្នាក់ងារអង្គការJICA ដើម្បីជំរុញការផ្តល់ជំនួយរថយន្តក្រុង១៨០ គ្រឿងឲ្យបានមកដល់កម្ពុជាឆាប់ ក៏ដូចការងារជំនួយខាងបច្ចេកទេសទាំងធនធានមនុស្ស ទាំងរថយន្ត ផងដែរ ពិសេសបច្ចេកទេសផ្នែកសេវាគ្រប់គ្រងលើការដឹកជញ្ជូនសារធារណៈ ។
គួររំលឹកថា៖ ឯកឧត្តម Masakazu HAMACHI អនុរដ្ឋមន្ត្រីក្រសួងការបរទេសជប៉ុន ធ្លាប់អញ្ជើញមកទស្សនកិច្ចជាផ្លូវការមកកាន់កម្ពុជាកាលពីថ្ងៃទី ២១ មីនា ឆ្នាំ២០១៦ ជាអធិបតីក្នុងពិធីចុះហត្ថលេខាលើការផ្តល់ជំនួយឥតសំណង និងប្រាក់កម្ចីជាង៥៣លានដុល្លាររបស់រដ្ឋាភិបាលជប៉ុន ដែលជាថវិកាសម្រាប់គ្រោងជួសជុលស្ពានជ្រោយចង្វា កម្មវិធីបោសសម្អាតមីន និងជួសជុលផ្លូវជាតិលេខ៥ នៅក្នុងប្រទេសកម្ពុជា៕
...
ដោយ៖ សំរិត
