ខេត្តព្រះវិហារ៖ បើយោងតាមការបញ្ជាក់ពីលោក នួន សុខុម នាយខណ្ឌរដ្ឋបាលព្រៃឈើខេត្តព្រះវិហារ បានឱ្យដឹងថា លោកបានដឹកនាំមន្ត្រីផ្នែកព្រៃឈើរវៀង ដោយសហការណ៍ជាមួយកម្លាំងមន្ត្រីឧទ្យានុរក្ស នៃមន្ទីរបរិស្ថានខេត្តព្រះវិហារ ដែលមានការចូលរួមពីអាជ្ញាធរមានសមត្ថកិច្ចនៅក្នុងមូលដ្ឋានជាច្រើនរូប នៅរសៀលថ្ងៃទី៧ សីហា ឆ្នាំ២០២១ម្សិលមិញនេះ បានចុះបង្ក្រាប និងរឹបអូស បានឈើជ្រុងរាប់សិបកំណាត់ និងឧបករណ៍កែច្នៃឈើមួយចំនួន ស្ថិតនៅក្នុងភូមិសុច ឃុំស្តៅ ស្រុកសង្គមថ្មី ខេត្តព្រះវិហារ។
លោក នួន សុខុម បានបន្តថា នៅក្នុងប្រតិបត្តិការចុះបង្ក្រាបបទល្មើសព្រៃ និងធនធានធម្មជាតិខាងលើនេះ ដោយក្រោមកិច្ចសម្របសម្រួលពីលោក ថុល គឹមហ៊ឹង ព្រះរាជអាជ្ញារង នៃអយ្យការអមសាលាដំបូងខេត្តព្រះវិហារ បន្ទាប់ពីទទួលបានព័ត៌មានថា៖ មានឈ្មួញមួយក្រុមតូច បានធ្វើសកម្មភាពប្រើប្រាស់រថយន្តទំនើបៗ ចូលដឹកជញ្ជូនឈើនៅក្នុងតំបន់ខាងលើនោះ យ៉ាងអនាធិបតេយ្យ ទាំងយប់ទាំងថ្ងៃនោះរួចមក។
នាយខណ្ឌរដ្ឋបាលព្រៃឈើរូបនេះ បានបញ្ជាក់បន្ថែមថា ក្រោយទទួលបានព័ត៌មាននោះភ្លាម កម្លាំងជំនាញរដ្ឋបាលព្រៃឈើខេត្ត បានសហការណ៍ជាមួយកម្លាំងឧទ្យានុរក្ស នៃមន្ទីរបរិស្ថានខេត្ត ដែលមានការចូលរួមពីសមាជិកក្រុមប្រឹក្សាឃុំស្តៅ និងមន្ត្រីប៉ុស្តិ៍រដ្ឋបាលជាច្រើនរូប បានចុះទៅកាន់ទីតាំងស្តុកទុកឈើ ៣ ទៅ៤ទីតាំង និងបានរកឃើញសុទ្ធតែឈើជ្រុង ប្រភេទឈើឈ្លីករាប់សិបកំណាត់ ហើយក៏បានធ្វើការរឹបអូស និងដឹកជញ្ជូនយកមករក្សាទុក នៅផ្នែករដ្ឋបាលព្រៃឈើរវៀង ដើម្បីចងក្រងសំណុំរឿង ចាត់ការតាមច្បាប់។
សូមជម្រាបថា បទល្មើសព្រៃឈើធនធានធម្មជាតិ និងជីវៈចម្រុះ នៅក្នុងដែនព្រៃអភិរក្សនៃខេត្តព្រះវិហារ ត្រូវគេបានសង្កេតឃើញថា នៅតែរងការកាប់បំផ្លិចបំផ្លាញ អារ ពុះ និងច្រៀកជាស៊ីឡាំង៤ជ្រុង ពីអ្នកស៊ីឈ្នួលកាប់ឈើលក់ឲ្យក្រុមឈ្មួញដែលមានលុយ និងមានខ្នងបង្អែកគ្រាក់ៗនៅពីក្រោយ ដើម្បីដឹកជញ្ជូនយកទៅធ្វើជំនួញ ដោយផ្គើនទៅនឹងបទបញ្ជារបស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា។ ខណៈក្រុមឈ្មួញមួយក្រុមផ្សេងទៀត ដែលគេស្គាល់ថា ជាក្រុមឈ្មោះ ភ័ក្ត្រ នៅខេត្តកំពង់ធំ បានប្រើប្រាស់រថយន្តស៊េរីទំនើបៗ ប្រមាណ៨គ្រឿង ចូលមកដឹកជញ្ជូនឈើនៅក្នុងភូមិសុច និងភូមិតាសែង ស្រុកសង្គមថ្មី អស់រយៈពេលជាយូរមកហើយនោះ៕
ដោយ៖សហការី
