ខេត្តកំពង់ស្ពឺ៖ ប្រជាពលរដ្ឋដែលរកស៊ីដឹកអនុផលព្រៃឈើបានធ្វើការរិះគន់ទៅលើលោក តាំងចាន់សែម៉ា នាយផ្នែករដ្ឋបាលព្រៃឈើឱរ៉ាល់ថាមិនសូវនៅកន្លែងធ្វើការហើយបានអោយបងប្រុសបង្កើតដែលមិនមានតួនាទីនិងជំនាញនៅចាំអង្គុយយកលុយពីពួកគាត់ទៅវិញគ្រាន់តែពួកគាត់រកស៊ីក្រាន់ចិញ្ចឹមជីវិតបានមួយរស់។
ប្រជាពលរដ្ឋមួយរូបបាននិយាយក្នុងលក្ខ័ណមិនបញ្ចេញឈ្មោះថាពួកគាត់រកស៊ីដឹកអនុផលព្រៃឈើរាល់ថ្ងៃគ្រាន់បានចំណេញបន្តិចបន្តួចដើម្បីចិញ្ចឹមកូនប៉ុណ្ណោះហើយមកដល់កន្លែងថ្នាលបណ្តុះកូនឈើរបស់ផ្នែករដ្ឋបាលព្រៃឈើឱរ៉ាល់នេះត្រូវបង់លុយចាប់ពី៥ម៉ឺនរៀល រហូតដល់២០ម៉ឺនរៀលជាថ្នូរនឹងមិនចាប់។
ប្រភពបានបន្តទៀតថាគេមិនដែលឃើញលោក តាំង ចាន់សែម៉ា នាយសង្កាត់រដ្ឋបាលព្រៃឈើនៅធ្វើការនោះឡើយហើយម្យ៉ាងវិញទៀតមិនដែលឃើញលោកចុះបង្ក្រាបបទល្មើសព្រៃឈើបានមួយករណីឡើយ ហើយអ្វីដែលចំឡែកនោះគឺលោកនាយផ្នែកបានហៅបងប្រុសបង្កើតរបស់ខ្លួនដែលមិនមានតួនាទីនិងជំនាញរដ្ឋបាលព្រៃឈើសោះមកអង្គុយចាំយកលុយពីប្រជាពលរដ្ឋដែលរកស៊ីតិចតួចនោះ ។ដោយឡែកក្រុមឈ្មួញដែលរកស៊ីដឹកឈើលួចបង្កប់ឈើប្រណិតវិញនោះលោកតាំង ចាន់សែម៉ា គិតលុយជាប្រចាំខែទើបមិនមានការបង្ក្រាបបែបនេះ ។ ប្រជាពលរដ្ឋសំណូមពរដល់ថ្នាក់លើមេត្តាជួយពិនិត្យមើលទង្វើរបស់លោក តាំង ចាន់សែម៉ានេះផងបើបណ្តែតបណ្តោយតទៅទៀតខ្លាចក្រែងព្រៃឈើនៅក្នុងខេត្តកំពង់ស្ពឺរងនូវការវិនាសហិនហោចអស់គ្មានសល់៕
ដោយ៖ សេនា សក្តិ
