ខេត្តស្វាយរៀង៖ បុរសចំណាស់ម្នាក់បានរងរបួសធ្ងន់ ខណ:ជួបករណីគ្រោះថ្នាក់ចរាចរណ៍ជិះម៉ូតូបុកគូថរថយន្ត
ពីក្រោយដែលបានខូចហើយឈប់ចតលើគន្លងផ្លូវម៉ូតូខ្វះការប្រុងប្រយ័ត្នយ៉ាងពេញទំហឹង បង្កការភ្ញាក់ផ្អើលដល់សមត្ថកិច្ចទាំងយប់។

ហេតុការណ៍នេះបានកើតឡើងកាលពីវេលាម៉ោង៧និង៣០នាទីយប់ថ្ងៃទី៣០ ខែសីហា ឆ្នាំ ២០២១ លើផ្លូវជាតិលេខ១ ចន្លោះគីឡូម៉ែត១១៨និង១១៩ ស្ថិតនៅភូមិព្នៅ ឃុំតាសួស ស្រុកស្វាយជ្រំ ខេត្តស្វាយរៀង ។

សមត្ថកិច្ចនគរបាលស្រុកបានឲ្យដឹងថាបុរសចំណាស់ដែលរងរបួសធ្ងន់មានឈ្មោះ គង់ សុភាព  អាយុ៦០ឆ្នាំ មុខរបរកសិករ រស់នៅភូមិ អង្គាសដី ឃុំតាសួស ស្រុកស្វាយជ្រំខេត្តស្វាយរៀង ជិះម៉ូតូមួយគ្រឿង ម៉ាកហុងដាC១២៥ ពណ៌ខ្មៅ ពាក់ស្លាកលេខ ភ្នំពេញ១CS ២៩១៤ខូចខាតយ៉ាងដំណំ។

ចំណែកអ្នកបើករថយន្តមិនត្រូវបានស្គាល់អត្តសញ្ញាណនោះទេក្រោយពីកើតហេតុដោយឃើញសភាពការណ៍មិនស្រួលក៏បានរត់គេចខ្លួនភ្លាមៗផងដែរ។

តាមសាក្សីបានអោយដឹងថាមុនកើតហេតុមានរថយន្តមួយគ្រឿងម៉ាកសាំយ៉ុងពណ៌ទឹកប្រាក់ ពាក់ស្លាកលេខភ្នំពេញ២I៩១៥៩បើកបដោយបុរសម្នាក់មិនស្គាល់អត្តសញ្ញាណក្នុងទិសដៅពីលិចមកកើតបន្ទាប់មករថយន្តក៏បានខូចហើយឈប់ចតលើគន្លងផ្លូវម៉ូតូខ្វះការប្រុងប្រយ័ត្នស្រាប់តែមានម៉ូតូមួយគ្រឿងម៉ាកហុងដាC១២៥ ពណ៌ខ្មៅ ពាក់ស្លាកលេខ ភ្នំពេញ១CS ២៩១៤បើកក្នុងទិសដៅស្របគ្នាណាមួយយប់ងងឹតផងក៏បុកពីក្រោយពេញទំហឹងបង្កការភ្ញាក់ផ្អើលតែម្ដង។

ក្រោយមក បុរសរងគ្រោះត្រូវបានសមត្ថកិច្ចដឹកយកមកសង្គ្រោះនៅមន្ទីរពេទ្យចំណែកមធ្យោបាយធ្វើដំណើរទាំងពីរគ្រឿងត្រូវបានវាស់វែងនិងអូសយកមករក្សាទុកនៅអធិការដ្ឋាននគរបាលស្រុកស្វាយជ្រំដើម្បីដោះស្រាយពេលក្រោយតាមច្បាប់៕

ដោយ៖ យឹម  សុថាន