ភ្នំពេញ៖ បេីយោងតាមប្រភពព័ត៌មានពីកាកបាទក្រហមកម្ពុជា បានឱ្យដឹងថា ក្រុមការងារឥស្សរជនឆ្នើមថ្នាក់ជាតិ នៃកាកបាទក្រហមកម្ពុជា សហការជាមួយ ក្រុមការងារឥស្សរជនឆ្នើម នៃសាខាកាកបាទក្រហមកម្ពុជា ខេត្តកំពត នៅថ្ងៃទី ១៨ ខែកញ្ញា ឆ្នាំ២០២១នេះ បានរៀបចំពិធីផ្សព្វផ្សាយ ស្តីពី «ការលុបបំបាត់ការចម្លងមេរោគអេដស៍ និងស្វាយពីម្តាយទៅកូន» ជូនដល់អ្នកផ្ទុកមេរោគអេដស៍ និងស្ត្រីមានផ្ទៃពោះ ចំនួន ១៧នាក់ នៅភូមិកំពង់បាយខាងត្បូង សង្កាត់កំពង់បាយ ក្រុងកំពត ខេត្តកំពត។
ក្នុងឱកាសនោះ លោកស្រី លាងហៃ ជាវតាយ អនុប្រធានអចិន្ត្រៃយ៍គណៈកម្មាធិការសាខាកាកបាទក្រហមកម្ពុជា ខេត្តកំពត និងជាប្រធានក្រុមការងារឥស្សរជនឆ្នេីមថ្នាក់សាខា ខេត្តកំពត បានសម្តែងនូវក្តីរីករាយដោយបានជួបសំណេះសំណាលជាមួយបងប្អូនទាំងអស់ និងបានលេីកឡេីងពីគុណតម្លៃ ពីតួនាទី និងពីសកម្មភាពគំរូរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ទេីបអង្គការសហប្រជាជាតិបានមេីលឃេីញ និងទទួលស្គាល់ហេីយផ្តល់គោរមងារជូនសម្តេច ជាឥស្សរជនឆ្នេីមថ្នាក់ជាតិ នៃវេទិកាភាពជាអ្នកដឹកនាំតំបន់អាស៊ី-ប៉ាស៊ីហ្វិកឆ្លេីយតបមេរោគអេដស៍ជំងឺអេដស៍ និងការអភិវឌ្ឍនៅកម្ពុជា នៅឆ្នាំ២០០៦ និងជាឥស្សរជនឆ្នេីមថ្នាក់ជាតិ នៃផែនការសកម្មភាពរួមអគ្គលេខាធិការអង្គការសហប្រជាជាតិ ដេីម្បីសុខភាពស្ត្រីនិងកុមារ នៅឆ្នាំ២០១១។
ជាមួយគ្នានេះ បន្ទាប់ពីបានស្តាប់បទបង្ហាញពី លោកស្រី មុំ ចន្ទី និងលោកបណ្ឌិត វ៉ា សុភ័ក្ត្រ លេខាធិការក្រុមការងារឥស្សរជនឆ្នេីមថ្នាក់ជាតិ រួចមក បងប្អូនស្ត្រី និងអ្នកផ្ទុកមេរោគអេដស៍ទាំងអស់ បានបង្ហាញពីការយល់ដឹងរបស់ខ្លួនកាន់តែច្រេីនពីសារប្រយោជន៍នៃការមកពិនិត្យផ្ទៃពោះបានទៀតទាត់ និងសារសំខាន់នៃការធ្វេីតេស្តឈាមមុនពេលសម្រាលដេីម្បីទប់ស្កាត់ការចម្លងមេរោគអេដស៍ និងស្វាយពីម្តាយទៅកូន ដេីម្បីចូលរួមជាចរន្តជាតិមួយ ឈានឆ្ពោះទៅបញ្ចប់បញ្ហាអេដស៍នៅកម្ពុជា នៅឆ្នាំ២០២៥។
ទន្ទឹមនឹងនេះ បងប្អូនប្រជាពលរដ្ឋទាំងអស់ បានបង្ហាញពីភាពច្បាស់ការក្នុងការអនុវត្តតាមវិធានការរដ្ឋបាល និងវិធានការនានារបស់ក្រសួងសុខាភិបាល ដេីម្បីចូលរួមទទួលខុសត្រូវទប់ស្កាត់ការចម្លងមេរោគកូវីដ-១៩។
សូមបញ្ជាក់ថា ស្ត្រីទាំង ១៧នាក់ បានទទួលវត្ថុអនុស្សាវរីយ៍ពីកាកបាទក្រហមកម្ពុជា ក្នុងម្នាក់ៗទទួលបាន ៖ អង្ករ មី ត្រីខ ទឹកត្រី សម្ភារប្រេីប្រាស់ កញ្ចប់អនាម័យ សម្ភារផ្ទះបាយ និងថវិកា ១០ម៉ឺនរៀល៕
ដោយ៖សហការី
