ភ្នំពេញ៖ មុនេះទើបនឹងធ្វើឲ្យទស្សនិកជនភ្ញាក់ផ្អើលខ្លាំងករណីប្តីប្រពន្ធមួយគូបានធ្វើការបញ្ចេញព័ត៌មានថាតារាចម្រៀងល្បីឈ្មោះលោក អ៊ីណូ គេចវ៉េសមិនព្រមទូទាត់ប្រាក់ដែលបានជំពាក់។ ករណីនេះបង្កើតឲ្យមានការហួសចិត្តមិនតិចឡើយព្រោះតែតារាចម្រៀងរូបនេះទើបនឹងប្រកាសបើកដំណើរការហ្គារ៉ាស់លក់រថយន្តថ្លៃរាប់សែនដុល្លារអាមេរិកនោះ ប៉ុន្តែពេលនេះអ្វីៗបានបញ្ចប់ហើយលោកថែមទាំងបង្ហាញពីជំនួញក៏កាន់តែកាក់កប ខណៈដែលខ្លួនក៏ទើបនឹងសែនព្រេនទទួលយកនារីវ័យក្មេងម្នាក់មកធ្វើជាភរិយាថែមទៀតផង។
ក្រោយបិទបញ្ចប់ករណីចម្រូងចម្រាសរឿងជំពាក់ប្រាក់ ក្រៅរបងតុលាការតារារុបនេះហាក់ឡើងយីអ៊ុនទៅវិញ។ ងាកមកមើលពីមុខរបររកស៊ី និងជីវិតស្នេហាវិញតារាប្រុសរូបនេះស្រាប់តែយីអ៊ុនឡើងស្រឺតៗតែម្តង។ តាមការបញ្ជាក់របស់តារាប្រុសរូបនេះនៅតែបញ្ចេញរូបភាពនៃជំនួញផ្នែកលក់រថយន្តរបស់លោកនៅតែបន្តរលូន ពោលគឺមានការលក់ចេញឥតមានលោះថ្ងៃណាឡើយ ដែលបញ្ជាក់បានថាលោកនៅតែឈរជើងយ៉ាងរឹងមាំជាមួយជំនួនមួយនេះផងដែរ។ កាន់តែធ្វើឲ្យគេភ្ញាក់ផ្អើលក្នុងរយៈពេលប៉ុន្មានថ្ងៃចុងក្រោយនេះគឺស្រាប់តែគេបានឃើញតារាប្រុសរូបនេះបានសែនព្រេនជាមួយយុវតីដ៏ស្រស់សោភាម្នាក់ ដើម្បីទទួលយកគ្នាជាប្តីប្រពន្ធ។ នារីនោះមានឈ្មោះថាថៃ ម៉ានីតា អាយុ២២ឆ្នាំមានស្រុកកំណើតនៅខេត្តបន្ទាយមានជ័យ ក្រោយពីរូបលោកនិងនាងបានស្រលាញ់គ្នា២ឆ្នាំ ហើយការ សែនប្រពន្ធក្មេងជាស្រីស្អាតនេះគឺធ្វើឡើងដោយចំហមានទាំងចាស់ទុំទាំងសងខាងដឹងលឺផងដែរ។
ក្រោយសែនព្រេនរួចអ៊ីណូ នាំប្រពន្ធក្មេងជិះរថយន្តទំនើបថ្លៃកប់ពពកធ្វើដំណើរកម្សាន្ត និងបង្ហោះរូបថតបង្អួតអ្នកគាំទ្រ និងជាការបញ្ជាក់ដោយបើកចំហរឥតលាក់លៀមរឿងមានប្រពន្ធនោះឡើយ។ លោកក៏បានបង្ហាញភាសាផ្អែមល្ហែមត្រជាក់ចិត្ត ដែលធ្វើឲ្យអ្នកគាំទ្រស្ទើលើសជាតិស្ករម្តងម្កាលផងដែរ៕

ដោយ៖ វឌ្ឍនា