ភ្នំពេញៈ ទីតាំងចែកចាយប្រើប្រាស់គ្រឿងញៀនដ៏ធំមួយនៅតំបន់ ត្រពាំងឈូកត្រូវបានកំលាំងអធិការដ្ឋានខណ្ឌសែនសុខសហការណ៍ជាមួយកំលាំងប៉ុស្តិ៍ទឹកថ្លា ចុះបង្ក្រាបនិងឃាត់ខ្លួនអ្នកប្រើប្រាស់គ្រឿងញៀនបានជនសង្ស័យ២នាក់​ និងសម្ភារៈសេពគ្រឿងញៀនមួយចំនួន កាលពីរសៀលថ្ងៃទី 01 ខែមេសាឆ្នាំ2016​ នៅចំណុចក្រុម11​ ភូមិត្រពាំងឈូក​ សង្កាត់ទឹកថ្លា ខណ្ឌសែនសុខ។

ករណីចុះបង្ក្រាបគ្រឿងញៀនខាងលើ ដឹកនាំដោយ លោក សក់ ចន្ទ័កញ្ញារិទ្ធ អភិបាលរងខណ្ឌសែនសុខ និងលោក​ ម៉ក់ ហុង​ អធិការខណ្ឌសែនសុខ ឃាត់ខ្លួនបាន02នាក់ ក្នុងនោះដកហូតបាន ម៉ូតូ 01គ្រឿងម៉ាក C125 ពណ៌ខ្មៅសេរីឆ្នាំ2012ពាក់ស្លាកលេខ ភ្នំពេញ1BG -7270​ គ្រឿងញៀនមួយកញ្ចប់តូច​ និងឧបករណ៍សំរាប់សេពគ្រឿងញៀនមួយចំនួន។

គួរបញ្ជាក់ថាទីតាំងដែលសមត្ថកិច្ចចុះបង្ក្រាបខាងលើនេះប្រមូលផ្តុំដោយក្មេងទំនើងបងតូចបងធំដែលតែងតែមកជួបជុំគ្នានិងជាជំរកសំរាប់ប្រើប្រាស់គ្រឿងញៀនទោះបីសមត្ថកិច្ចមូលដ្ឋានខិតខំនិងព្យាយាមបង្ក្រាបជាច្រើនលើកច្រើនសារយ៉ាងណាក៏ដោយក៍មិនចេះអស់ដែល។

បច្ចុប្បន្នក្រុមអ្នកប្រើប្រាស់គ្រឿងញៀទាំង02នាក់ រួមទាំងវត្ថុតាងខាងលើត្រូវបាននាំខ្លួនយកទៅធ្វើការសាកសួរនៅអធិការដ្ឋាននគរបាលខណ្ឌសែនសុខដើម្បីកសាងសំណុំរឿងបញ្ជូនទៅតុលាការ៕

ដោយ៖​ តុង សីហា