ភ្នំពេញ៖ យុវជន១០នាក់ ដែលជាមុខសញ្ញាក្រុមចោរឆក់ កាបូប ទូរស័ព្ទ យ៉ាងសកម្មក្នុងរាជធានីភ្នំពេញ ត្រូវបានកម្លាំងកងរាជអាវុធហត្ថខណ្ឌដូនពេញសហការជាមួយ អាវុធហត្ថខណ្ឌចំការមន អាវុធហត្ថខណ្ឌឬស្សីកែវ និងអាវុធហត្ថរាជធានីភ្នំពេញ ចុះធ្វើការស្រាវជ្រាវរហូតកំណត់មុខសញ្ញាជនសង្ស័យទាំងអស់នោះជាបន្តបន្ទាប់ និងដកហូតម៉ូតូ៣គ្រឿង សុទ្ធតែស៊េរីទំនើប ។

ករណីឃាត់ខ្លួនក្រុមចោរឆក់ខាងលើនេះ បានធ្វើនៅវេលាម៉ោង៨ និង៣០នាទីព្រឹកថ្ងៃទី០១ ខែមេសា ឆ្នាំ២០១៦ ដោយឃាត់នៅក្នុងមូលដ្ឋានខណ្ឌដូនពេញ និងខណ្ឌចំការមន រាជធានីភ្នំពេញ ។

តាមប្រភពព័ត៌មានពីមន្រ្តីកងរាជអាវុធខណ្ឌដូនពេញ បានឲ្យដឹងថា ដោយមានពាក្យបណ្តឹងរបស់ជនរងគ្រោះឈ្មោះអង ស្រីលីន ភេទស្រី អាយុ១៩ឆ្នាំ ថាមានករណីឆក់កាបូបនៅចំណុចកោះពេជ្រ សង្កាត់ទន្លេបាសាក់ ខណ្ឌចំកាមន កំលាំងជំនាញរបស់កងរាជអាវុធខណ្ឌចំកាមនបានអន្តរគមន៍ រហូតឈានទៅដល់ការឃាត់ខ្លួនជនសង្ស័យ៤នាក់ជាមុខសញ្ញាឆក់យ៉ាងសកម្មក្នុងរាជធានីមានទី១-ឈ្មោះប៉ែន ហាលីម ភេទប្រុស ១៩ឆ្នាំ ទី២-សល់ ពិសិដ្ឋ ភេទប្រុស ១៩ឆ្នាំ ទី៣-សោម ដេវិត ភេទប្រុស ១៧ឆ្នាំ
ទី៤-ព្រំ សង្ហា ភេទប្រុស ២១ឆ្នាំ ដកហូតម៉ូតូ១គ្រម៉ាក Honda zoomer X ស្លាកលេខភ្នំពេញ 1FT-4167 ។

ក្រោយពីឃាត់ខ្លួនជនសង្ស័យយកសាកសួរដោយមានការដឹកនាំពីលោកមុាំង សុខលុច ទើបតាមជំនាញអាវុធហត្ថក្រុង អាវុធហត្ថខណ្ឌឬស្សីកែវ និងអាវុធហត្ថខណ្ឌដូនពេញបានស្រាវជ្រាវនិងឃាត់បក្ខពួកចំនួន៦នាក់បន្ថែមទៀតដោយទី១ឈ្មោះប៊ុណ្ណា ឃីម ភេទប្រុស អាយុ១៦ឆ្នាំ ដកហូតម៉ូតូ១គ្រឿងម៉ាក Honda Zoomer X ពណ៌ខ្មៅ ស្លាកលេខភ្នំពេញ 1FT-6240(ឃាត់នៅខណ្ឌដូនពេញ ) ទី២-ឈ្មោះភួង សុផាន់ណាក់ ១៨ឆ្នាំ ប្រុស ទី៣-ឈ្មោះសុឹម សំណាង ភេទប្រុស អាយុ២១ឆ្នាំ ទី៤-ឈ្មោះអោក ឧត្តមប្រឹក្សាបូរីរត្ន័ ភេទប្រុស អាយុ១៩ឆ្នាំ ទី៥-ឈ្មោះគឹម ធីម៉ូថេ ភេទប្រុស អាយុ១៦ឆ្នាំ និងទី៦-ឈ្មោះឆែម ភា ហៅសាក់ ភេទប្រុស អាយុ១៨ឆ្នាំ ដកហូតម៉ូតូម៉ាក Suzuki Nex ពណ៌ស ស្លាកលេខ ភ្នំពេញ 1DE-1719 (ទាំង៥នាក់ឃាត់នៅខណ្ឌឬស្សីកែវ) ។

បច្ចុប្បន្នជនសង្ស័យទាំង១០នាក់ រួមនិងម៉ូតូ៣គ្រឿងត្រូវបានបញ្ជូនទៅការិយាល័យព្រហ្មទណ្ឌដើម្បីចាត់ការតាមនីតិវិធី ។

គួរបញ្ជាក់ផងដែរថា ករណីខាងលើនេះគឺកម្លាំងកងរាជអាវុធហត្ថ សហការគ្នា៣ខណ្ឌ ដូចជាអាវុធហត្ថខណ្ឌដូនពេញ ខណ្ឌចំការមន និងខណ្ឌឫស្សីកែវ ហើយក្រុមចោរឆក់ទាំងអស់នេះក្នុងម្នាក់ចេញឆក់មិនក្រោម២០ដងទេ ៕

ដោយ៖ ស ដារ៉ា