ខេត្តកំពង់ចាម ៖ កម្លាំងជំនាញការិយាល័យប្រឆាំងគ្រឿងញៀនខេត្តកំពង់ចាម សហការជាមួយកម្លាំងជំនាញនៃអធិការដ្ឋាននគរបាលស្រុកចំការលើ និងកម្លាំងអធិការដ្ឋាននគរបាលស្រុកស្ទឹងត្រង់ ក្រោមការដឹកនាំដោយផ្ទាល់ពីលោកឧត្តមសេនីយ៍ត្រីជីវ សេងរស់ ស្នងការរងទទួលផែនការងារប្រឆាំងគ្រឿងញៀនបានបេីកកិច្ចសហការបង្ក្រាបករណីជួញដូរដោយខុសច្បាប់នូវសារធាតុញៀន ដោយប្រេីវិធានញុះញង់ ក្នុងនោះឃាត់ខ្លួនជនសង្ស័យបាន៣នាក់ជាបន្តបន្ទាប់ និងចាប់យកវត្ថុតាងមួយចំនួនមកចាត់ការតាមច្បាប់កាលពីថ្ងៃទី៣០ ខែកញ្ញា ឆ្នាំ២០២១ ។
លោកឧត្តមសេនីយ៍ត្រី ជីវ សេងរស់ បានឱ្យដឹងថា បន្ទាប់ពីប្រជាពលរដ្ឋរាយការណ៍មកលោកឧត្តមសេនីយ៍ទោ ឯម កុសល ស្នងការនគរបាលខេត្តកំពង់ចាម និងដោយមានការសម្របសម្រួលការងារពីលោក សុធា ពិសិដ្ឋ ព្រះរាជអាជ្ញារង នៃអយ្យការអមសាលាដំបូងខេត្តកំពង់ចាម លោកស្នងការបានចាត់បញ្ជាកម្លាំងបេីក កិច្ចប្រតិបត្តិការចុះបង្ក្រាបករណីជួញដូរគ្រឿងញៀនភ្លាមៗ ដែលកិច្ចសហការបង្ក្រាបនោះយើងបានឃាត់ខ្លួនជនសង្ស័យជាបន្តបន្ទាប់មានដូចខាងក្រោម៖
១-ឈ្មោះ ម៉ៅ ដានិត ភេទប្រុស អាយុ ២៥ឆ្នាំ ជនជាតិខ្មែរអ៊ិស្លាម មុខរបរមិនពិតប្រាកដ រស់នៅភូមិដីក្រហម ឃុំសូភាស ស្រុកស្ទឹងត្រង់ ខេត្តកំពង់ចាម ។
២-ឈ្មោះ ហ៊ីម ហាំតាន ភេទប្រុស អាយុ៣១ឆ្នាំ ជនជាតិខ្មែរអ៊ិស្លាម មុខរបរមិនពិតប្រាកដ រស់នៅភូមិអូរបេង ឃុំមេសរជ្រៃ ស្រុកស្ទឹងត្រង់ ខេត្តកំពង់ចាម។
៣-ឈ្មោះ តក់ វណ្ណា ហៅស្វិត ភេទប្រុស អាយុ៣២ឆ្នាំ ជនជាតិខ្មែរ មុខរបរជាងសំណង់ រស់នៅភូមិមាឃ២ ឃុំព្រែកកក់ ស្រុកស្ទឹងត្រង់ ខេត្តកំពង់ចាម ។
ចំពោះជនសង្ស័យទាំង៣នាក់ខាងលើបានធ្វើតេស្តសំណាកកូវីដ-១៩ ជាលទ្ធផល (អវិជ្ជមានទាំង០៣នាក់) ។ ក្នុងនោះដកហូតវត្ថុតាងរួមមាន៖ ម្សៅក្រាមពណ៌សសង្ស័យជាថ្នាំញៀនចំនួន ០៦កញ្ចប់(ធំ០២កញ្ចប់)និងទូរស័ព្ទដៃចំនួន០៤គ្រឿង ៕
ដោយ៖ វណ្ណៈ
