ខេត្តព្រះវិហារ៖ បច្ចុប្បន្ននេះគម្របព្រៃឈើព្រះរកា ស្ថិតនៅក្នុងតំបន់ព្រៃឈើការពារព្រះវិហារ កំពុងទទួលរងការបំផ្លាញពីជនខិលខូចរាល់ថ្ងៃ ដើម្បីយកឈើប្រណីត ទៅលក់ឲ្យឈ្មួញ បើទោះបីមានការចុះល្បាតការពារ និងបង្ក្រាបបទល្មើសពីសំណាក់សមត្ថកិច្ចជំនាញមេព្រៃយ៉ាងណាក៏ដោយ។
សេចក្ដីរាយការណ៍បានឲ្យដឹងថា ឈើប្រណីត ដែលជាឈើលេខ១ ប្រភេទសុក្រំ គគីរត្រូវបានជនខិលខូចនាំគ្នាដឹកជញ្ជូនយកទៅលក់ឲ្យ ឈ្មួញល្បីឈ្មោះម្នាក់ ឈ្មោះគិត និងប្រពន្ធរបស់គាត់ ដែលមានរោងសិប្បកម្មធំមួយកន្លែង ស្ថិតនៅភូមិពោធិ៍ទាប ឃុំម្លូព្រៃ១ ស្រុកឆែប ខេត្តព្រះវិហារ។ ហ៊ាគិតនិងប្រពន្ធរបស់គាត់ អាចផលិតកែច្នៃសន្លឹកទ្វារ បានចំនួន១០សន្លឹក ធ្វើពីឈើប្រណីត និងឈើលេខ១ ក្នុង១ថ្ងៃៗ ដើម្បីដឹកយកទៅលក់នៅខេត្តសៀមរាបកាត់តាមសង្កាត់រដ្ឋបាលព្រៃឈើ គូលែនយ៉ាងរលូន។
ឆ្មាំឃ្លាំមើលបទល្មើសព្រៃឈើតាមដងផ្លូវជាតិលេខ៩ និងលេខ៦២បានឲ្យដឹងថា ឈ្មោះគិតនៅតែរកស៊ីដឹកឈើតាប់ និងសន្លឹកទ្វារតាមរថយន្តសាំយ៉ុង និងរថយន្តកូរ៉េ ចំណុះ៥តោន ហើយបានរត់ការបង់លុយតាមដងផ្លូវឲ្យសមត្ថកិច្ចគ្រប់ស្ថាប័ន ដើម្បីជាថ្នូរមិនឲ្យចាប់បង្ក្រាប។ រោងសិប្បកម្មកែច្នៃឈើរបស់ឈ្មួញម្នាក់នេះធំណាស់ ប៉ុន្តែមានអ្នកធំនៅរាជធានីភ្នំពេញកាងនៅពីក្រោយខ្នងមិនឲ្យ មេព្រៃនៅខេត្តព្រះវិហារ និងមេព្រៃខាងជើងបឹងទន្លេសាបប៉ះពាល់ជាដាច់ខាត។
ប្រភពព័ត៌មានដដែលបានថ្លែងដូច្នេះថា ឈ្មួញឈើដុះស្លែឈ្មោះគិត រស់នៅទីរួមស្រុកគូលែនរកស៊ីដឹកឈើ និងធ្វើអាជីវកម្មបើករោងសិប្បកម្មកែច្នៃឈើប្រណីតជិត២០ឆ្នាំមកហើយ។គាត់បានក្លាយទៅជាសេដ្ឋី និងមានប្រពន្ធ២ថែមទៀត ព្រោះបានស៊ើបដឹងថាគាត់បានសង់ផ្ទះវិឡារនៅទីរួមស្រុកគូលែន ទិញផ្ទះល្វែង១ជង់ក្បែរបុរីសៀងណាំ និងទិញដីចំនួន២ប្លង់ក្នុងបុរីសៀងណាំថែមទៀត។
អ្នកសារព័ត៌មានមិនអាចទំនាក់ទំនងសាកសួរឈ្មួញឈើឈ្មោះគិតបានទេ ពាក់ព័ន្ធទៅនឹងប្រភពព័ត៌មានចោទប្រកាន់គាត់ខាងលើនេះ។
ដោយឡែកឈ្មួញឈើល្បីឈ្មោះម្នាក់ទៀតឈ្មោះកេនមកពីខេត្តសៀមរាប ក៏ត្រូវបានភ្នាក់ងាររាយការណ៍ឲ្យដឹងថា បានសម្ងំប្រមូលទិញឈើតាប់សុក្រំ និងឈើក្ដារគគីររាប់រយម៉ែត្រគូបចេញពីភូមិបុស្សធំឃុំប្រមេរ ស្រុកត្បែងមានជ័យ ដើម្បីដឹកជញ្ជូនយកទៅលក់ផ្គត់ផ្គង់ឲ្យសណ្ឋាគារផ្កាយ៥មួយកន្លែងនៅ ឯខេត្តសៀមរាប ដោយប្រើល្បិចជ្រកក្រោមអាជ្ញាប័ណ្ណរបស់ក្រុមហ៊ុនសម្បទាន សេដ្ឋកិច្ចនៅខេត្តព្រះវិហារ៕
ដោយ៖ វិបុល
