អន្តរជាតិ៖ បើតាមទីភ្នាក់ងារសារព័ត៌មានថៃ Bangkok Post ដែលបានដកស្រង់ការចេញផ្សាយពីក្រសួងសុខាភិបាលថៃ បានប្រកាសនៅថ្ងៃសុក្រទី០៨ ខែតុលា ឆ្នាំ២០២១នេះថា៖ គិតត្រឹមរយៈពេល២៤ម៉ោងប៉ុណ្ណោះ អាជ្ញាធរមូលដ្ឋានបន្តរកឃើញករណីឆ្លងជំងឺ COVID-19 ថ្មីៗចំនួន ១១,១៤០ករណីបន្ថែមទៀត ខណៈដែលអ្នកជំងឺកូវីដ-១៩ ចំនួន ១១៦នាក់បន្ថែមទៀត ក៏ត្រូវបានរាយការណ៍ថាស្លាប់ផងដែរ ក្នុងរយៈពេល២៤ម៉ោងចុងក្រោយដូចគ្នា។
ក្រសួងសុខាភិបាលថៃ បានបញ្ជាក់បន្ថែមថា ក្នុងចំណោមករណីឆ្លងថ្មីៗខាងលើនេះ មាន១១,០៦៨ករណី ត្រូវបានរកឃើញនៅលើប្រជាជនថៃទូទៅ និង៧២ករណីទៀតត្រូវបានរកឃើញនៅលើអ្នកទោសតាមពន្ធនាគារ។ ក្រៅពីការរកឃើញករណីឆ្លងថ្មីៗខាងលើនេះ ក៏មានអ្នកជំងឺចំនួន៩,៩៣៣នាក់ផ្សេងទៀត ក្រោយព្យាបាលជាសះស្បើយត្រូវបានអនុញ្ញាតឱ្យចាកចេញពីមន្ទីរពេទ្យផងដែរ។
គួរបញ្ជាក់ថា គិតត្រឹមពេលនេះ ប្រទេសថៃ បានចាក់វ៉ាក់សាំងបង្ការ COVID-19 សរុបចំនួន ៥៧.៥៩លានដូស ក្នុងនោះប្រជាជន ២២.១លាននាក់ (ជាង ៣១% នៃចំនួនប្រជាជនសរុប) បានទទួលការចាក់គ្រប់ដូស។ ចំណែកករណីឆ្លងជំងឺ COVID-19 សរុបនៅទូទាំងប្រទេសថៃ រហូតមកទល់ពេលនេះ បានកត់ត្រាសរុបមានចំនួន ១,៦៨៩,៤៣៧ករណី ក្នុងនោះមានអ្នកស្លាប់ ១៧,៥៣៤នាក់ និងអ្នកជាសះស្បើយឡើងវិញ ១,៥៦១,៧៩០នាក់៕ដោយ៖ស តារា
រូបភាព៖ឯកសារ Reuters
