ខេត្តកណ្តាល៖ ប្រភពព័ត៌មានពីសមត្ថកិច្ចមុននេះបន្តិចជនរងគ្រោះដែលមានគ្នាចំនួន៩នាក់ជិះក្នុងរថយន្តឡិចស៊ីសRX300 ពណ៌ស ពាក់ស្លាកលេខភ្នំពេញ2S-9169 ឆ្លងដរធ្លាក់ទន្លេមុនដំបូងសង្ស័យស្លាប់៧នាក់ ហើយ២នាក់ទៀតសង្គ្រោះបានទាន់ពេលវេលា ប៉ុន្តែក្នុងចំណោមសាកសព មានជនរងគ្រោះ១រូបនៅមានដង្ហើម សមត្ថកិច្ចជួយសង្គ្រោះក៏បានរួចផុតពីការស្លាប់ចំនួន៣នាក់ និង៦នាក់ទៀតបានស្លាប់គួរឲ្យរន្ធត់ កាលពីវេលាម៉ោង៧​ និង៤០នាទីយប់ថ្ងៃទី៣ ខែមេសា ឆ្នាំ២០១៦ នៅចំណុចកំពង់ចម្លងស្វាយប្រទាល-អុងប៉ាង ស្រុកស្អាង ខេត្តកណ្តាល។

សមត្ថកិច្ចបានឲ្យដឹងថា មុនពេលកើតហេតុពួកគាត់ទាំងអស់គ្នាបានធ្វើដំណើរមកពីឆេងម៉េង អ្នកបើកបរបានស្រវឹងជោគជាំ សាច់ញាតិបានអង្វរមិនឲ្យបើកតែគេមិនព្រម និងថែមទាំងសាច់ញាតិរកវាយថែមទៀតដោយភាពរឹងទទឹងទើបបង្កឲ្យមានគ្រោះថ្នាក់កើតឡើងបណ្តាលឲ្យសាច់ញាតិស្លាប់៦នាក់ ៣នាក់រួចផុតពីគ្រោះថ្នាក់ក្នុងហេតុការណ៍នេះ។

សមត្ថកិច្ចបានបន្តទៀតថា រថយន្តនេះទើបនឹងបានទិញថ្មីៗរួចហើយក៏ដឹកសាច់ញាតិទៅឆេងម៉េងចុងក្រោយជួបគ្រោះចង្រៃបណ្តាលឲ្យស្លាប់ស្ទើរដាច់ពូជដោយសារអ្នកបើកបរស្រវឹងហើយមិនស្តាប់ការអង្វរ។

បច្ចុប្បន្នអ្នកបើកបរដែលបើកក្នងស្ថានភាពស្រវឹងនោះត្រូវបានសមត្ថកិច្ចឃាត់ខ្លួនយកទៅអធិការដ្ឋានស្រុកស្អាងដើម្បីធ្វើការសាកសួរ និងវាស់ជាតិអាល់កុល៕

ដោយ៖ សុខ ខេមរា