ភ្នំពេញ៖ នៅព្រឹកថ្ងៃទី ២៧ ខែតុលា ឆ្នាំ ២០២១នេះ លោក ឃួង ស្រេង អភិបាល រាជធានីភ្នំពេញ បានចូលខ្លួនមកបង់ប្រាក់ពិន័យ៦ម៉ឺនរៀលករណីលោកបានបេីកម៉ូតូត្រួតពិនិត្យស្ថានភាពទឹកជំនន់នៅខណ្ឌដង្កោមិនបានពាក់មួកសុវត្ថិភាព ។
នេះជាគំរូល្អមួយដល់មន្ត្រីទូទៅដេីម្បីរួមចំណែកគោរពច្បាប់ចរាចរណ៍ទាំងអស់គ្នា។
សូមបញ្ជាក់ផងដែរថា លោក ម៉េត មាសភក្ដី អ្នកនាំពាក្យសាលារាជធានីភ្នំពេញម្សិលមិញ បន្ទាប់ពីមានការរិះគន់ចំពោះលោក ឃួង ស្រេង អភិបាលរាជធានីភ្នំពេញ ដែលមិនបានពាក់មួកសុវត្ថិភាព ពេលបេីកម៉ូតូនោះ លោកបានលើកឡើងថា នៅព្រឹកថ្ងៃទី២៧ ខែតុលា ឆ្នាំ២០២១ លោក ឃួង ស្រេង នឹងចូលខ្លួនទៅបង់ការផាកពិន័យចំពោះកំហុសឆ្គងដោយអចេតនានេះ ។
លោក ម៉េត មាសភក្ដី បានបញ្ជាក់បន្ថែមថា តាមពិតទៅ លោកអភិបាលក៏បានយកមួកសុវត្ថិភាពមកពាក់ដែរ ប៉ុន្តែដោយកញ្ចក់មួកសុវត្ថិភាពស្រអាប់ពេកពិបាកមេីលផ្លូវ ម្យ៉ាងទៀតដោយមានការបន្ទាន់ចុះពិនិត្យមេីលស្ថានភាពទឹកជំនន់ដេីម្បីរកដំណោះស្រាយជួយប្រជាជនផងនោះ ទើបលោកអភិបាលបេីកម៉ូតូទៅដោយមិនបានពាក់មួកសុវត្ថិភាព ។
ប៉ុន្តែទោះជាយ៉ាងណាក្ដី លោកអភិបាល ទទួលយកនូវមតិរិះគន់ដេីម្បីស្ថាបនា ហេីយលោកនឹងចូលទៅឱ្យមន្ត្រីចរាចរណ៍ធ្វើការផាកពិន័យហើយ ។ សូមបងប្អូនមេត្តាយោគយល់ចំពោះកំហុសអចេតនានេះផង។
ដើម្បីចូលរួមអនុវត្តច្បាប់ចរាចរណ៍ទាំងអស់គ្នា លោក ឃួង ស្រេង អភិបាលនៃគណៈអភិបាល រាជធានីភ្នំពេញ បានចូលខ្លួនបង់ប្រាក់ពិន័យតាមផ្លូវច្បាប់នៅស្នាក់ការនគរបាលចរាចរណ៍ផ្លូវគោក បង្ហាញពីការទទួលស្គាល់កំហុសដោយអចេតនា ទោះបីលោកនិងសហការី ប្រឈមនឹងការមមាញឹកការងារ ជួយធ្វើអន្តរាគមន៍រំដោះប្រជាពលរដ្ឋរងគ្រោះដោយជំនន់ទឹកភ្លៀង ទាំងយប់ ទាំងថ្ងៃក៏ដោយ ។
ប្រជាពលរដ្ឋគាំទ្រលោក គោរព ស្រឡាញ់ លោក ដែលបានគិតគូរប្រជាពលរដ្ឋគ្រប់កាលៈទេសៈ ក្នុងពាក្យថា ខ្មែរជួយខ្មែរ , ទីណាមានការលំបាក ពិតជាមានមន្ត្រីដែលបម្រើរាស្ត្រចុះទៅដល់ជួយសង្រ្គោះ ជួយធ្វើអន្តរាគមន៍តាមការណែនាំ ពីសម្តេចតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា ៕
ដោយ, សិលា
