ភ្នំពេញ៖ ថ្មីៗកន្លងទៅនេះ ជនជាប់ចោទឈ្មោះ ម៉ែន ច័ន្ទរិទ្ធី ភេទប្រុស អាយុ៣៦ឆ្នាំ មានទីលំនៅបច្ចុប្បន្នផ្ទះលេខ៨០២ដេ ភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ត្រូវបានចៅក្រមស៊ើបសួរសាលាដំបូងរាជធានីភ្នំពេញសម្រេចដោះលែងឲ្យនៅក្រៅឃុំ បន្ទាប់ពីសមត្ថកិច្ចនគរបាល ព្រហ្មទណ្ឌកម្រិតស្រាលរាជធានីភ្នំពេញឃាត់ខ្លួន អនុវត្តតាមដីកាបង្គាប់ឲ្យនាំខ្លួនរបស់ចៅក្រម ម៉េង តូនី ពាក់ព័ន្ធទៅនឹងបទឆបោក កាលពីថ្ងៃទី៣ ខែមីនា ឆ្នាំ២០១៤ បទល្មើស ដែលមានបញ្ញាតិឲ្យផ្តន្ទាទោសតាមមាត្រា៣៧៧ និងមាត្រា៣៧៨ នៃក្រមព្រហ្មទណ្ឌ ។
ពាក់ព័ន្ធទៅនឹងជនជាប់ចោទ ម៉ែន ច័ន្ទរិទ្ធី ត្រូវបានរងនូវការរិះគន់យ៉ាងខ្លាំងពីមន្ត្រីតុលាការ ដោយចោទប្រកាន់ទៅខាងសមត្ថកិច្ចនគរបាលព្រហ្មទណ្ឌកម្រិតស្រាលរាជធានីភ្នំពេញ ឃាត់ខ្លួនជនជាប់ចោទ ក្នុងសំណុំរឿងពីរ ដែលមានដីកា២ ប៉ុន្តែអនុវត្តដីកាតែ១ ។ ក្នុងនោះ អនុវត្តដីកាបង្គាប់ឲ្យនាំខ្លួនរបស់លោក ម៉េង តូនី ចៅក្រមស៊ើបសួរសាលាដំបូងរាជធានីភ្នំពេញ ដែលចេញកាលពីថ្ងៃទី២៩ ខែមីនា ឆ្នាំ២០១៦ ពីបទឆបោក ទឹកប្រាក់ចំនួន៤ម៉ឺនដុល្លារអាមេរិក ។ ក្រោយមក ពេលសមត្ថកិច្ចឃាត់ខ្លួនបញ្ជូនទៅសាលាដំបូង ចៅក្រម ម៉េង តូនី ក៏បានសម្រេចដោះលែងឲ្យមានសេរីភាព ប៉ុន្តែ គ្រាឃាត់ខ្លួនជនជាប់ចោទ នគរបាលដែលត្រូវអនុវត្តដីកា១ទៀត គឺដីកា បង្គាប់ឲ្យចាប់ខ្លួន-នាំខ្លួន ចេញដោយចៅក្រមជំនុំជម្រះ ពេជ ម៉ារ៉ែន ចុះថ្ងៃទី១ ខែកុម្ភៈ ឆ្នាំ២០១៦ បែរជា មន្ត្រីនគរបាលយុត្តិធម៌ជាអ្នកអនុវត្តច្បាប់ អនុវត្តតាមដីការបស់ចៅក្រមជំនុំជម្រះ បែរជាមិនអនុវត្ត និងមិនចាប់ខ្លួនជនជាប់ចោទ បញ្ជូនទៅដាក់ពន្ធនាគារ តាមដីកាបង្គាប់ឲ្យចាប់ខ្លួន-ឃុំខ្លួន ដែលបានផ្តន្ទាទោសទៅលើជនជាប់ចោទឈ្មោះ ម៉ែន ច័ន្ទរិទ្ធី ដាក់ពន្ធនាគារ កំណត់រយៈពេល២ឆ្នាំ ពីបទឆបោក ប្រព្រឹត្តនៅរាជធានីភ្នំពេញ កាលពីថ្ងៃទី៥ ខែមីនា ឆ្នាំ២០១៤ តាមមាត្រា៣៧៧ និងមាត្រា៣៧៨ នៃក្រមព្រហ្មទណ្ឌ ។ ក្នុងនោះ ចៅក្រមជំនុំជម្រះ លោកស្រី ពេជ ម៉ារ៉ែន ក៏បានបង្គាប់ឲ្យចាប់ខ្លួន ឃុំខ្លួនជនជាប់ចោទម៉ែន ច័ន្ទរិទ្ធី ដាក់ពន្ធនាគារ ម១ ព្រៃស នៃក្រសួងមហាផ្ទៃ តាមអំណាចសាលក្រមនេះ និងបង្គាប់ឲ្យជនជាប់ចោទឈ្មោះ ម៉ែន ច័ន្ទរិទ្ធីសងប្រាក់ដើមចំនួន១៥ម៉ឺនដុល្លារ និងជំងឺចិត្ត១ម៉ឺនដុល្លារទៅឲ្យដើមបណ្តឹងរដ្ឋប្បវេណី ។
បើទោះជាសាលក្រមនេះត្រូវបានជំនុំជម្រះ និងប្រកាសជាសាធារណៈនៅថ្ងៃទី២៦ ខែមករា ឆ្នាំ២០១៦ កំបាំងមុខជនជាប់ចោទ និងតម្រូវឲ្យមន្ត្រីនគរបាលអនុវត្ត ចាប់ខ្លួនជនជាប់ចោទតាមអំណាចដីកា បង្គាប់ឲ្យចាប់ខ្លួន ឃុំខ្លួន ផ្ទុយទៅវិញ នគរបាលព្រហ្មទណ្ឌកម្រិតស្រាល នៃស្នងការដ្ឋានរាជធានីភ្នំពេញអនុវត្តតែដីកាបង្គាប់ឲ្យនាំខ្លួនរបស់ចៅក្រមស៊ើបសួរលោក ម៉េង តូនី តែប៉ុណ្ណោះ ។ ដោយឡែក ដីកាបង្គាប់ឲ្យចាប់ខ្លួន ឃុំខ្លួនរបស់ចៅក្រមជំនុំជម្រះពេជ ម៉ារ៉ែន បែរជាមិនអនុវត្ត ។
មន្ត្រីតុលាការមានចម្ងល់ថា ហេតុអ្វីក៏សមត្ថកិច្ចអនុវត្តដីកាតែមួយទៅលើជនជាប់ចោទដែលមានដីកា២ ម្យ៉ាងទៀត ចំពោះដីកាបង្គាប់ឲ្យនាំខ្លួន ការដោះលែង ឬសម្រេចឃុំខ្លួនបណ្តោះអាសន្ន គឺជាឆន្ទានុសិទ្ធិរបស់លោក ម៉េង តូនី ចៅក្រមស៊ើបសួរសាលាដំបូងរាជធានីភ្នំពេញ ។ ប៉ុន្តែចំពោះដីកាបង្គាប់ឲ្យចាប់ខ្លួន ឃុំខ្លួន ដែលចេញដោយចៅក្រម ជំនុំជម្រះ លោកស្រី ពេជ ម៉ារ៉ែន ពិតជាមិនអាចដោះលែងបាន តម្រូវឲ្យជនត្រូវចោទអនុវត្តនូវទោសកំណត់រយៈពេល២ឆ្នាំ ។ ពាក់ព័ន្ធករណីនេះ នាយការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ បានប្រាប់«នគរដ្រេហ្គន»តាមទូរស័ព្ទនាព្រឹកថ្ងៃទី៧ ខែមេសា ឆ្នាំ២០១៦ថា ខ្ញុំបានទទួលដីកាតែ១ប៉ុណ្ណោះ គឺដីកាបង្គាប់ឲ្យនាំខ្លួនរបស់ចៅក្រមស៊ើបសួរលោក ម៉េង តូនី ។ ដោយឡែកដីកា១ទៀត ខ្ញុំមិនទាន់បានទទួលទេ ហើយក៏មិនខុសអីដែរ ។
បើតាមការទម្លាយឲ្យដឹងពីមន្ត្រីតុលាការ ការដោះលែងជនជាប់ចោទដោយចៅក្រមស៊ើបសួរលោក ម៉េង តូនី ក្នុងទឹកប្រាក់ចំនួន៤ម៉ឺនដុល្លារពីបទឆបោក អាចពាក់ព័ន្ធទៅនឹងអំពើពុករលួយ សូកប៉ាន់ ខណៈនគរបាលព្រហ្មទណ្ឌកម្រិតស្រាលអនុវត្តដីការបស់ចៅក្រមស៊ើបសួរ ហើយមិនបានអនុវត្តដីការបស់ចៅក្រមជំនុំជម្រះ ដើម្បីចាប់ជនជាប់ចោទ យកទៅដាក់ពន្ធនាគារផ្តន្ទាទោសទៅតាមកំណត់២ឆ្នាំនោះ ។
ករណីនេះ ត្រូវរងនូវការរិះគន់យ៉ាងចាស់ដៃពីមជ្ឈដ្ឋានខាងក្រៅថា សមត្ថកិច្ចពេលខ្លះ មានដីការបស់តុលាការនៅដៃ មានកំហុសឆ្គងដោយបុគ្គលមន្ត្រីនគរបាលមួយចំនួនតូច បែរជាយកដីកាដែលចេញដោយតុលាការ ប្រៀបដូចជាមូលប្បទានបត្រសម្រាប់ប្រយោជន៍ខ្លួនឯង និងមិនបានអនុវត្តទៅតាមភារកិច្ចតួនាទីក្នុងនាមជាមន្ត្រីនគរបាលយុត្តិធម៌ ៕
ដោយ៖ សុខ ខេមរា
